Los Angeles, zjarri masiv detyron evakuimin e qindra banorëve

Me qindra zjarrfikës dhe vullnetarë po luftojnë kundër zjarrit, që deri tani ka shkrumbuar një sipërfaqe të madhe toke dhe ka detyruar shumë njerëz të braktisin shtëpitë e tyre.

Policia lokale tha se, 600 njerëz morën urdhra evakuimi, ndërsa me mijëra të tjerë kanë lënë shtëpitë e tyre, pasi flakët po përparojnë me shpejtësi. Të evakuuarit janë strehuar në qendra emergjence të ngritura në shkollat e zonës.

Mediet bëjnë me dije se, autoritetet kanë ndalur deri tani vetëm 15% të zjarrit dhe kjo nuk është aspak e mjaftueshme për të garantuar sigurinë e njerëzve. Mësohet se, me dhjetëra ndërtesa dhe shtëpi janë prekur nga flakët, ndërsa kanë nisur hetimet për të zbuluar shkakun e zjarrit.

Autoritetet dyshojnë se nuk bëhet fjalë për shkaqe natyrore, por ka raporte për një makinë që u përplas dhe dëmtoi shtyllat e tensionit të lartë, duke shkaktuar flakët në bimësinë rreth e rrotull vendit të aksidentit. Më pas flakët janë përhapur me shpejtësi edhe falë temperaturave të larta dhe erërave të forta në zonë.

Top Channel