Merkel: Nëse mbyllim kufijtë, Europa merr fund

04/06/2016 00:00

“Nëse i mbyllim kufijtë, Europa merr fund”. Kështu ka deklaruar kancelarja gjermane Angela Merkel, gjatë kongresit të CDU-së, duke reaguar kështu ndaj planeve të Austrisë, që për të frenuar fluksin e emigracionit ka njoftuar mbylljen e kalimit të Brenerit, në kufirin mes Italisë dhe Austrisë.

Merkel ka deklaruar se deri para pak kohësh 50 mijë persona arritën në kufirin mes Greqisë dhe Maqedonisë. “Nëse këto flukse tani spostohen drejt Libisë dhe Italisë, nuk mund të themi të mbyllim Bernerin”, ka deklaruar kancelarja.

Sipas Merkel, duhet një “solidaritet i arsyeshëm”, edhe më i arsyeshëm se parashikimet dhe përforcimi i bashkëpunimit me vendet që kufizojnë zonat e krizave.

“Duke e dhënë ndihmën në vendin ku ka nevojë, bien motivet për t’u nisur drejt Europës në duart e skafistëve”, ka thënë Merkel.

Ajo ka kujtuar se, që nga fillimi i vitit disa qindëra persona janë mbytur gjatë arratisjes përmes detit nga vendet e luftës.

“Nuk mund të shtiremi sikur nuk ka ndodhur gjë dhe të themi që skafistët të bëjnë ç’të duan dhe ne të mbyllim kufijtë”, ka shtuar Merkel.

Top Channel