Stewart mbron kinemanë franceze

Protagonistja e “Personal Shopper” nga regjisori francez Olivier Assayas, gjendej në Kanë për të promovuar filmin e pavarur i cili garon për “Palmën e Artë”. Filmi që u shfaq të martën, ishte i pari që shkaktoi reagime jomiratuese nga publiku i festivalit të Kanës.

Për këtë kontribuoi subjekti misterioz, mungesa e dialogut dhe finalja e dykuptimtë e filmit. Por Stewart deklaroi për agjencinë e lajmeve “Reuters” se i pëlqen të rrezikojë duke u përfshirë në filma me një kulturë jokomerciale.

“Mund të kuptosh fare qartë dallimin mes arsyeve që shtyjnë francezët dhe amerikanët të prodhojnë filma. Më pëlqen fakti se në Francë producentët nuk vdesin për të mbledhur para dhe për të fituar një konkurs. Ata duan thjesht të tregojnë një histori, prandaj ndihem në shtëpi këtu”, u shpreh ajo.

Stewart u bë aktorja e parë amerikane që në vitin 2015 fitoi çmimin “Cesar”, ekuivalenti i “Oscarit” në Francë, si aktorja më e mirë jo protagoniste për rolin në “Clouds of Sils Maria”, një tjetër prodhim i regjisorit Assayas.

Stewart nuk është një emër i ri i kinemasë së pavarur. Ajo ka aktruar në një sërë filmash të tillë përpara dhe në mes të sagës “Twilight” nga viti 2008 der më 2012. Stewart është gjithashtu protagoniste e filmit të Woody Alen “Cafe Society”, që u shfaq jashtë konkurrimit në hapje të festivalit.

Top Channel