Dekriminalizim dhe në Kosovë, Thaçi: Të pastrojmë dhe drejtësinë

Në një debat të organizuar nga shoqëria civile, presidenti kosovar tha se do të kërkojë edhe ndryshime në Kodin Penal, në mënyrë që të ndikojë në pastrimin e gjithë sistemit të drejtësisë.

“Që njerëz me aktakuza të mos jenë në institucione, as në nivel qendror, as nivel lokal. Por kjo do të zgjerohet. Do të kërkojmë që të ketë kod edhe në kuptimin e mediave dhe financimin e mediave, edhe të shoqërisë civile, por natyrisht edhe zhvillimin e bizneseve. Sepse kërkohet një pastrim i tërë sistemit”, ka deklaruar Thaçi.

Gjatë debatit, presidenti ka folur edhe për Gjykatën Speciale, e cila sipas tij do të heqë njollat e zeza që i janë veshur Kosovës.

“Vendimi për themelimin e Gjykatës Speciale ka qenë vendim i drejtë. Ka qenë e nevojshme dhe e domosdoshme që gjëra të tilla që i vishen njerëzve në Kosovë apo Kosovës të çlirohen njëherë e përgjithmonë”, ka deklaruar Thaçi.

Duke folur për bisedimet mes Kosovës dhe Serbisë, ai ka shtuar se ato duhet të intensifikohen dhe të arrihet marrëveshja për pajtim mes dy popujve.

Ndërsa sa i takon krizës politike, Thaçi ka inkurajuar dialogun e nisur mes subjekteve dhe, siç tha ai, do të respektojë çdo marrëveshje që arrihet mes tyre.

Top Channel