Gjermani, të gjithë kundër AfD-së; refuzohet axhenda “islamofobe”

02/05/2016 14:45

Manifesti i adoptuar nga partia gjermane e ekstremit të djathte, AfD është dënuar me forcë nga politikanë e komunitete fetare në vend.

Kryetari i Këshillit të Myslimanëve të Gjermanisë, Aiman Mazyek, deklaroi se axhenda “islamofobe” e kësaj partie nuk ndihmon aspak në zgjidhjen e problemeve. Ajo nuk do të bëjë gjë tjetër veçse do të përçaje akoma më shumë shoqërinë, u shpreh Mazyek.

I së njëjtës linjë mendimi ishte dhe lideri i Shoqatës së Hebrenjve në vend, Joseph Shuster, i cili e bëri të qartë së politikat anti-islamike të AfD-së dëshmojnë intolerancën e kësaj force politike dhe një mungesë të thellë respekti ndaj minoriteteve fetare.

Ashpër reagoi dhe Gerda Hasselfeldt, një prej figurave kryesore të partisë simotër të konservatorëve të Angela Merke;, CSU-së, e cila pohoi për gazeten “Die Welt” se asnjë parti demokratike nuk do të bashkëpunonte me lideren e Alternativës për Gjermaninë, Frauke Petry.

“Ëndrra e saj për t’u bërë pjesë e qeverisë në 2017-n, pas zgjedhjeve të përgjithshme do të dështoje”, u shpreh Hasselfeldt. Për fjalinë “Feja islame nuk është pjesë e Gjermanisë”, që ndodhej në projektprogramin e AfD, pati pakënaqësi në mbarë vendin.

Gjatë kongresit të tyre dyditor në Shtutgart, populistët e djathtë e konfirmuan kursin kritik ndaj fesë islame, ndërsa në programin e tyre kërkohet ndër të tjera ndalimi i minareve, thirrjes së Muezinit dhe mbulimit të plotë të femrave me perçe.

Top Channel