Presidenti Barack Obama zhvilloi komedinë e radhës dhe ndoshta të fundit me fjalë të mprehta, në atë që konsiderohet si mbrëmja e Shtëpisë së Bardhë kushtuar korrespondentëve. Një mbrëmje që përfundoi me fjalët “Obama out” (Jashtë Obama), që u shoqërua me heqjen e mikrofonit dhe të qeshurat pa fund të gazetarëve të pranishëm.
Performanca e së shtunës e Obamës tregoi edhe njëherë se ai nuk ka humbur asnjë çast. “Nëse ky material funksionon mirë, do ta përdor atë te Goldman Sachs vitin e ardhshëm”, thumboi presidenti amerikan. “Më lejoni të fitoj disa kartmonedha 20 dollarëshe”, shtoi më tej ai, duke përmendur emrin e Harriet Tubman, aktivistes së të drejtave civile të lindur nga prindër skllevër, fytyra e së cilës pritet të zëvendësojë figurën e Andreë Jackson në prerjet 20 dollarëshe.
Obama shkaktoi shumë të qeshura me komentet e tij ironike në një sallë vallëzimi të mbushur me gazetarë, politikanë, por edhe yje të kinematografisë dhe televizionit. Kjo e djeshmja ishte dalja e tij e tetë në një ngjarje të tillë, por edhe e fundit për të si president, teksa me shaka foli për dhimbjet e të qenit një person i çalë që duhej të largohej tashmë.
“Javën e kaluar, Princi George u shfaq në takimin tonë me rroba banje – deklaroi Obama. – Gjë që ishte një shuplakë në fytyrë”. Ndërkohë, pati edhe momente kur Obama u shfaq nostalgjik. “8 vite më parë kam thënë se kishte ardhur koha të ndërronim tonin e politikës sonë. Tashmë kam kuptuar se duhej të kisha qenë më specifik në atë që kam deklaruar”. E kështu pranoi se vitet kishin ikur duke bërë të tyren. “Tashmë jam më gri, i thinjur dhe…duke numëruar ditët deri në takimin me vdekjen”.
Në anën tjetër theksoi se vlerësimi ndaj tij është ende i lartë. “Herën e fundit që kam pasur kaq shumë mbështetje – tha ai, – kam qenë duke u përpjekur të marr vendime tepër të rëndësishme”. E kur tha se nuk mundet ta shpjegojë këtë rritje të popullaritetit të tij, dy fotografi të kandidatëve të ngrysur presidencialë u shfaqën në ekranin e sallës së vallëzimit: Donald Trump dhe Ted Cruz.
Obama lëshoi të tjera thumbime sa i përket garës presidenciale, duke theksuar se “vitin e ardhshëm, në po të njëjtin muaj, dikush tjetër do të jetë këtu në këtë vend tepër të nxehtë. Por varet nga mendimi i gjithkujt se kush do të jetë…ajo”. Një referim i qartë këtu për kandidaten demokrate për presidente, Hillary Clinton.
Pasi e quajti kandidatin presidencial Bernie Sanders si fytyrën e re të shndritshme të Partisë Demokratike, Obama përplasi në kontrast të thellë dy slogane: “Feel the Bern” dhe “Trudge Up the Hill”.
Republikanët ishin në shënjestër të shumicës së “baterive” humoristike të Obamës. “Kur të ftuarit u pyetën se çfarë dëshironin, biftek apo peshk – tha ai mes të ftuarve në mbrëmje, – një pjesë e madhe e tyre shkruajtën në përgjigjen e tyre Paul Ryan”. Sa i përket biznesmenit miliarder dhe manjatit të pasurive të paluajtshme, kryesuesi i garës republikane Donald Trump, ai tha: Ai ka shpenzuar vite e vite të tëra takimesh me udhëheqës nga e gjithë bota. Është takuar me Miss Suedinë, Miss Argjentinën, Miss Azerbajxhanin…”.
Duke u kthyer nga humori në seriozitet, Presidenti Obama falënderoi trupën mediatike të Shtëpisë së Bardhë dhe lavdëroi median e lirë. Në fund të mbrëmjes u ndanë edhe çmime gazetarie dhe raportimi. E konkretisht fituan:
– Carol Lee nga “Wall Street Journal”, fitues i “Aldo Beckman Memorial Award” për përsosmërinë e mbulimit të ngjarjeve në Shtëpinë e Bardhë.
– Matt Viser nga “Boston Globe”, fitues i “Merriman Smith Award” për mbulimin e jashtëzakonshëm të ngjarjeve në Shtëpinë e Bardhë nën presionin e afateve kohore.
– Norah O’Donnell nga “CBS News”, fituese e “Merriman Smith Award” për gazetari transmetimi.
– Terrence McCoy nga “The Washington Post” por edhe Neela Banerjee, John Cushman Jr., David Hasemyer dhe Lisa Song nga “InsideClimate”, fitues të “Edgar A. Poe award”, që njeh përsosmërinë e mbulimit të ngjarjeve ose çështjeve investigative të interesit kombëtar apo rajonal.
Top Channel