Olimpiada e Rios, vonesa në përgatitje

Në vendin e sambës dhe futbollit po presin turneun e dytë të rëndësishëm sportiv, pas Botërorit 2014, dhe ndërsa presioni i Komitetit Olimpik shtohet, në Rio janë të bindur se do të kompletojnë planet.

Organizatorët e Olimpiadës së Rio de Zhaneiros që zhvillohet këtë verë dhe mbledh sportistët elitarë nga i gjithë planeti, vendosën theksin te parku i Barra da Tihuka, ku do të garojnë plot 23 disiplina të ndryshme.

“Arena e së ardhmes” quhet një prej impianteve që do të presë pjesëmarrës të lojërave por 4 muaj nga starti, as kjo nuk është gati. Impianti prej 12 mijë vendesh do ta ketë jetën shumë të shkurtër.

Ai do të presë ndeshjet e hendbollit në Lojërat Olimpike dhe ato Paraolimpike deri në shtator të këtij viti, e më pas do të shembet. Materialet ndërtuese do të shërbejnë për 4 shkolla të reja në Rio de Zhaneiro.

Ndërkohë puna vazhdon me ritme mesatare në Qendrën e Sporteve Ujore, një impiant me kapacitet 18 mijë vende ku do të garojnë dhjetëra sportistë për medaljet në not dhe vaterpolo.

Por në vendin e goditur nga kriza ekonomike dhe skandalet politike, pak kush e ka vëmendjen në një turne sportiv, qoftë ky edhe i përmasave globale si Olimpiada.

Top Channel