“El Clasico”, Barca kërkon fitoren për Cruyff

02/04/2016 00:00

Në orën 20:30 do të luhet sonte në Camp Nou, derbi më i bukur i botës së futbollit. Sfida Barca – Real, e njohur si El Clasico, sigurisht që është dhe derbi më spektakolar i globit.

Por nëse në vitet e shkuara kjo përballje gjigantësh luhej për titullin kampion në Spanjë, këtë sezon është pak më ndryshe. Reali i Zidane është 10 pikë larg nga katalanasit kryesues, por kjo gjë nuk do ta sfumojë spektaklin që pritet të dhurojë jashtokësori Messi me 2 ndihmësit e tij Suarez e Neymar kundër Bale, Benzema dhe Cristiano Ronaldo.

Yjet e Barcës nuk kanë nevojë për reklamë, ndërkohë që te madrilenët e gjithë vëmendja do të jetë te uellsiani Bale, i cili kërkon t’i mbushë mendjen drejtuesve që e ardhmja e Realit është ai dhe jo Cristiano.

700 gazetarë dhe shumë personalite të futbollit europian janë të ftuar sonte në Camp Nou për të ndjekur nga tribuna këtë përballje, e cila për Barcelonën do të jetë dhe një mundësi për të nderuar Johan Cruyyf, njeriun që ndryshoi mentalitetin e këtij klubi. Futbollistët do të dalin në fushë me një fanelë ku në gjoks do të ketë mbishkrimin “Faleminderit Johan”.

Një El Clasico që pritet të dhurojë spektakël pa fund, jo vetëm nga prezenca e lojtarëve më të paguar në fushë, por edhe në trubuna.

Nuk mund të mbeten jashtë këtij shou edhe tifozët katalanas, të cilët do të shpalosin një koreografi gjigante në nder të Legjendës Cruyff.

Top Channel