Napoli fiton ndaj Torinos, sërish -1 nga Interi

Gjithçka në këtë takim u vendos në 45 minutat e para. Kur nuk shënon argjentinasi Higuain, te Napoli përgjegjësitë i merr Insigne. Italiani ishte autori i golit të parë në këtë ndeshje, në minutën e 16, ndërsa më pas miqtë nga Torino barazuan me Quagliarella-n në minutën e 33. Por ndeshja nuk qëndroi gjatë në barazim, pasi sllovaku Hamsik shënoi edhe golin e dytë për ekipin e presidentit Aurelio De Laurentiis.

Në pjesën e dytë, të besuarit e trajnerit Sarri arritën ta menaxhojnë më së miri rezultatin dhe dolën nga ky takim me 3 pikë mjaft të rëndësishme në garën për titull kampion në Itali.

Në këtë ndeshje, po ashtu si edhe në takimet e tjera të Seria A, te Napoli në krahun e djathtë të mbrojtjes u aktivizua shkodrani Elseid Hysaj, i cili çdo ditë e më shumë po tregon se ka vlera dhe me përkushtimin e thjeshtësinë që e karakterizon, po kthehet në një prej lojtarëve më të mirë në Serie A. Ndaj Torinos, Hysaj mbrojti mirë, thuajse perfekt, ndërsa shpesh mendonte edhe të ndihmonte shokët e tij në repartin e avancuar.

Padyshim që në ecurinë pozitive të Napolit në këtë sezon në Serie A deri tani, një meritë mjaft të madhe kanë edhe dy personat që sezonin e kaluar ishin pjesë e Empolit, trajneri Sarri dhe mbrojtësi i tij i preferuar, Elseid Hysaj.

Pas këtij takimi napolitanët renditen të dytët me 38 pikë, një më pak se Interi kryesues. Por, pas dy javëve kalendari i Serie A i vendos këto dy skuadra përballë njëra-tjetrës, ndeshje e cila vendos jo pak për ecurinë e mëtejshme në kampionat edhe pse janë shumë javë për t’u luajtur.

Top Channel