Maqedoni, PDSH kërkon ligj për dekriminalizimin e politikës

“Sot ne kemi këtu deputet që kanë thyer procesin zgjedhor, kanë hyrë me revole në vendvotime, ka qenë i ndaluar nga policia dhe pushteti e ka liruar brenda një muaji, ndërsa sot është shef i grupit parlamentar të BDI-së. Kemi ministër që hetohet prej institucioneve amerikane për korrupsion të aferës ‘Magjar Telekom’, për të njëjtën aferë dyshohet edhe deputeti dhe lideri i BDI-së. Por, nuk shohim që procedohen këto lëndë prej pushtetit gjyqësor këtu”, u shpreh Ibrahimi.

Gjatë debatit publik për pavarësinë e sistemit gjyqësor, deputeti Orhan Ibrahimi tha se reformimi i pushtetit gjyqësor nuk mund të ndodh pa dekriminalizimin e politikës.

Ndaj këtyre akuzave nuk reagoi asnjë deputet i maxhorancës apo zyrtar i qeverisë i pranishëm në sallë. Ministri i Drejtësisë, Adnan Jashari, u përqendrua tek reformat që po ndërmerr institucioni që drejton ai dhe efektet që pritet të sjellin ato në sistemin gjyqësor.

“Rritja e ndërgjegjes në veçanti në implementimin e strategjisë nga ata që duhet të zbatojnë, ka prioritet dhe vlerësoj se pikërisht nga ata që duhet të zbatojnë këtë strategji do të varet suksesi, funksionimi dhe zhvillimi i sistemit gjyqësor”, deklaroi Jashari.

Gjatë debatit u diskutuan edhe shqetësimet e Komisionit Europian për mungesën e pavarësisë së gjyqësorit. Ndërkaq, deputetët e PDSH-së kërkuan nga Kuvendi të formojë disa komisione anketuese për zbardhjen e të gjitha rasteve të montuara politike.

Top Channel