Sulmoi eskortën e Mustafës, Prokuroria i ngre aktakuzë

Ndaj Trim Gashit rëndojnë tashmë akuzat për veprat penale “dhunë ndaj përfaqësuesve të lartë të Republikës së Kosovës, në tentativë” dhe “pengim i personit zyrtar gjatë kryerjes së detyrës zyrtare”.

Sipas Prokurorisë, policia e arrestoi Gashin pasi i pandehuri, sipas marrëveshjes paraprake me 4 persona të paidentifikuar, në rrugën “Ilir Konushevci” të Prishtinës, me disa mjete të përshtatshme për shkatërrimin e gomave të tipit metal me gjemba, kanë tentuar të shpojnë gomat e automjeteve të eskortës së Mustafës, por janë penguar nga personat zyrtarë.

Gjatë veprimeve të pjesëtarëve të Policisë së Kosovës, i pandehuri i ka sulmuar ata, duke iu shkaktuar lëndime trupore, bën të ditur komunikata e Prokurorisë. Në të njëjtën komunikatë, i bëhet e ditur opinionit se, i pandehuri Gashi është aktivist i Lëvizjes Vetëvendosje, e cila e kishte mohuar përfshirjen në këtë akt.

Megjithatë, Lëvizja Vetëvendosje e ka sqaruar tashmë qëndrimin e saj, duke thënë se Gashi nuk është aspak i përfshirë në një veprim të tillë, e duke shtuar se ai është arrestuar në shesh teksa mblidhte firma për peticionin kundër Zajednicës. Ndaj dhe, policia e ka rrëmbyer atë.

Top Channel