Bundesliga, rekordmeni Lewandowski nuk dëshiron të ulë ritmin

Ekipi i Pep Guardiolës mbeti i vetëm në krye të kampionatit gjerman, pas fitores 5-1 ndaj Wolfsburgut në mesjavë, 24 orë përpara se Dortmundi i Thomas Tuchel humbi pikët e para të këtij sezoni, kur barazoi 1-1 me Hoffenheimin.

Pavarësisht se shkroi historinë e Bundesligës me ato 5 gola të shënuar në një hapësirë kohore prej 9 muajsh kundër “ujqërve”, Robert Lewandowski nuk e ka ende të sigurt një vend titullari në skuadër përpara një jave tepër të ngjeshur për gjigantët bavarezë.

Pas Mainzit, Bayerni do të presë Dinamon e Zagrebit për Champions League, ndërsa më pas do të luajnë në “Allianz Arena”, më 4 tetor, një prej ndeshjeve më kyçe të kampionatit gjerman, atë ndaj Borussia Dortmundit. Festivali më i famshëm i birrës në botë, “Oktoberfest” është në kulmin e tij në Mynih, por Lewandowski shprehet se bavarezët kanë të tjera gjëra më të rëndësishme për t’u shqetësuar, sesa vizita e përvitshme te një prej sponsorëve të ekipit.

Në krahun tjetër, Dortmundi pret Darmstadtin, me lojtarin nga Gaboni, Pierre-Emerick Aubameyang që ka shkruar historinë duke shënuar në secilën prej 6 ndeshjeve të luajtura deri më tani në Bundesligë. Pavarësisht se barazuan në mesjavë, Dortmundi është ende i pamposhtur në 12 ndeshjet e para të këtij sezoni në të gjitha kompeticionet.

Wolfsburgu, që u mposht në mënyrë të turpshme nga Bayerni gjatë mesjavës, por që sezonin e kaluar u shpallën nënkampionë të Gjermanisë, tashmë është 7 pikë larg kryesuesve dhe pritet të luajnë pa Luiz Gustavon të shtunën, kur të vizitojnë Hannoverin e vendit të fundit.

Top Channel