Çështja Renault, Ecclestone: Do të ishte mëkat ta humbisnim nga F1

Pas deklaratave të dhëna javëve të kaluara nga drejtues të francezëve, të cilat lënë të dyshosh mbi të ardhmen e tyre që mbetet ende për t’u vlerësuar, kreu i sportit më të ndjekur të automobilizmit ka ndërhyrë për të dhënë mendimin e tij.

“Kanë thënë se do të marrin një vendim brenda shtatorit. Duhet të presim e t’i dëgjojmë, por nëse ka diçka që mund ta bëjmë për t’i ndihmuar, do të ishte gjë e mirë të mendonim që nuk do të zhdukeshin”.

Javën e kaluar, ishte vet përgjegjësi i “Motorsport Renault”, Cyril Abiteboul, i cili foli hapur për të ardhmen, duke deklaruar se në fund të kontratave aktuale me Red Bull dhe Toro Rosso, që skadojnë në vitin 2016, drejtuesit e francezëve do të vlerësonin edhe zgjedhje të ndryshme, gjë që mund të sillte edhe largimin nga bota e Formula 1.

Në fakt, zgjedhjet e mundshme janë vetëm 3: të vazhdojnë si furnizues motorësh, të braktistin sportin në fjalë, ose të rikthehen si konstruktorë të pavarur nën markën Lotus. Sigurisht, kjo e fundit është edhe mundësia që Ecclestone dëshiron të bëhet realitet.

“Do të më pëlqente dhe do të uroja që ata të rikthenin edhe njëherë Lotusin e dikurshëm, ose të ndërtonin diçka të re nga themeli”. Megjithatë një pengesë e madhe për këtë gjë është borxhi i ekipit anglez. Për më tepër, edhe vështirësitë me të cilat është përballur në pistë Renaulti gjatë këtij sezoni. Gjithsesi, e rëndësishme dhe parësore do të ishte të ndërtohej një njësi motorike kompetitive, përpara se të rikthehej si një skuderi më vete në kuptimin e plotë të fjalës.

Top Channel