Cerekfinalet e Botërorit

Gjermania vjen në këtë ndeshje pasi ka fituar 2-1 përballë Algjerisë, ku ajo që mbahet mend më tepër nga ajo ndeshje është paraqitja shumë e mirë e portierit Manuel Neuer, duke treguar mangësi të mëdha në repartin mbrojtës.

Gjithsesi, sot Hoakim Lëv do të ketë në dispozicion edhe mbrojtësin e Dortmundit, Mats Humels, që mund të zëvendësojë Shkodran Mustafin, i cili ka mbyllur këtë Botëror për shkak të një dëmtimi.

Përballë tyre Franca që kaloi Nigerinë me dy gola, duke shpëtuar ndeshjen nga ndërlikimet e shtesave. Didie Deshamp do të ketë sot në dispozicion mbrojtësin e Liverpulit Mamadu Sakho, që mund të zëvendësojë të dëmtuarin Koshielni. Sa i përket sulmit, përpara do të jetë Karim Benzema i mbështetur në krah nga Grizhman, ndërkohë që mesfusha e francezëve me shumë gjasa do të jetë sërish në dorën e Pol Pogba.

Ndërkohë, ndeshja e mbrëmjes së sotme do të jetë ajo mes Brazilit dhe Kolumbisë. Vendasit brazilianë shihen me mjaft interes në këtë Botëror duke qenë se konsiderohen edhe si pretendentët kryesorë. Në fazën e kaluar ata eliminuan Kilin me 11-metërsha, falë paraqitjes shumë të mirë të Zhulio Sezar. Trajneri Skolari ka kërkuar ndihmën e psikologes Rexhina Brandao që të ndihmojë lojtarët për të shmangur presionin e madh që po i ushtrohet, ndërkohë që lajmi më i mirë për ta është gjendja e mirë fizike e Nejmar, i cili do të jetë sot në fushën e lojës.

Kolumbia përballë tyre edhe pse në letër duket si më pak e avantazhuara e këtij takimi, ka elementë shumë të rëndësishëm në përbërje që mund ta dëmtojnë Brazilin. Sulmuesi i tyre kryesor James Rodrigez aktualisht kryeson dhe listën e golashënuesëve të Botërorit. Nëse për Kolumbinë kjo fazë e Botërorit është një fazë e panjohur, është trajneri argjentinas që i drejton, Hose Pekerman, ai i cili e njeh mirë këtë moment të Botërorit. Ai ka udhëhequr Argjentinën në vitin 2006, ku u eliminuan pikërisht në 8-she nga Gjermania me penallti.

Ndeshja mes Brazilit dhe Kolumbisë do të luhet në orën 22:00.

Top Channel