Milan, “bomberi” i Inzaghi-t quhet Mandzukic

Merkatoja kuqezi duket se është bërë tepër aktive gjatë orëve të fundit. Njoftimi për interesimin ndaj Mandzukic jepet nga “Repubblica”, por asnjë zyrtar nga “shtëpia” e Milanit nuk ka hedhur poshtë zërat.

Galliani është në krye të detyrës, ndërsa për Mandzukic do të ishte një lëvizje e duhur, pasi kroati 28-vjeçar është një sulmues i nivelit europian, e luan prej 2 sezonesh te Bayern Munchen.

Vlerësimi i bavarezëve për të është disi i lartë, bëhet fjalë për 30 milionë euro minimalisht, por ndoshta mund të hyhet në tratativa edhe për 22-25 milionë euro. Bayern duket se kërkon të privohet nga shërbimet e tij, pasi ka rrëmbyer Lewandowski-n nga Borussia Dortmund, një blerje e njoftuar që Janarin e kaluar, por që do të kompletohet nga 1 Korriku i kësaj vere.

Strategjia e kuqezinjve është e lidhur edhe me dëshirën e lojtarit, një goditje jo e pamundur, por edhe disi e vështirë për t’u realizuar.

Ndërkohë, kur kanë mbetur vetëm pak ditë nga fillimi i Botërorit, Balotelli është një nga emrat më të diskutueshëm në Itali. Mediat turke e japin të sigurt, madje kanë zbuluar një akord paraprak mes futbollistit dhe klubit të Galatasaray-t.

Presidenti Unal Aysal i ka premtuar Mancini-t dy superlojtarë, njëri prej të cilëve është SuperMario. Klubi nga Stambolli, pasi ka marrë miratimin e lojtarit, i ka ofruar Milanit 20 milionë euro, plus 7 milionë të tjera bonus. Por, nga Anglia shtohen zërat për një interesim të mundshëm të Arsenal.

Top Channel