Lotaria, Totozani në lëvizje

Kërkesa e Avokatit të Popullit vjen pas ankesës që ky institucion ka marrë nga kompania e skualifikuar greke Intralot. Kjo e fundit i është drejtuar më datën 13 korrik Ministrisë së Financave për informacion mbi përzgjedhjen e konsulentëve, por pasi dikasteri i financave ka refuzuar të përgjigjet i është drejtuar zyrës së Avokatit të Popullit.  

Në shkresën e firmosur nga zoti Totazani thuhet: “Shoqëria greke Intralot mendon se kriteret e konkurrimit janë hartuar në kushtet e konfliktit të interesit në përzgjedhjen e konsulentit të jashtëm “Vlaemink Partners” dhe konsulentit ligjor të jashtëm “Q-LOT”.

Në këto kushte kjo shoqëri kërkon ndërmjetësimin e Avokatit të Popullit për t’u vënë në dispozicion kopjet e dokumentacionit të praktikës administrative që është ndjekur. Më tej në letër Avokati i kërkon Ministrisë që brenda afatit të përcaktuar në ligj të vejë në dispozicion të kompanisë greke gjithë informacionin zyrtar të kërkuar duke njoftuar paralelisht për këtë edhe institucionin e Ombudsmanit.

Koncesioni për lotarinë kombëtare ka qenë një nga tenderat publik më të përfolur. Që para se të zhvillohej tenderi, disa kompani të skualifikuara nga gara akuzuan qeverinë se kishte miratuar kritere që kufizonin konkurrencën dhe çonin në rezultat të paracaktuar, duke përfolur si fituese lotarinë kombëtare të Austrisë.

Tenderi u zhvillua në datën 20 qershor dhe fitues u shpall pikërisht kompania e paralajmëruar, Lotaria Kombëtare e Austrisë, e cila për dhjetë vitet e ardhshme do të ketë monopolin e tregut dërrmues të bixhozit në Shqipëri, kundrejt një çmimi prej vetëm 3 milionë euro.

Top Channel