Ministrja e Arsimit, Sportit dhe Rinisë së Republikës së Shqipërisë Besa Shahini ka zhvilluar sot një takim në Prishtinë me homologen e saj Hykmete Bajrami, Ministre e Arsimit, Shkencës dhe Teknologjisë në Republikën e Kosovës.

Ky takim u zhvillua në kuadër të thellimit të mëtejshëm të bashkëpunimit në projektet e përbashkëta mes dy vendeve.

Ministrja Shahini prezantoi para homologes së saj disa prej nismave të suksesshme të ndërmarra në Shqipëri:

“Prezantova nismën e “Parlamentit të Nxënësve” si këshilltarin tim në fuqizimin e zërit të të rinjve, si dhe portalin “Mësues për Shqipërinë” si mekanizmi që ka rikthyer tashmë në sistemin arsimor cilësinë, meritokracinë dhe transparencën” – u shpreh Shahini në rrjetin e saj social.

Ndër të tjera, Ministrja Shahini shprehet se “Në vijim, do të intensifikojmë programin e shkëmbimit të nxënësve “Si N’Shtëpinë Tënde” dhe do të rrisim shkëmbimet e studentëve dhe pedagogëve për cilësi më të mirë të arsimit të lartë”.

Top Channel