Greqia mbyll hotspotet/ Hap qendra për emigrantët, shpejton azilin dhe dëbimin

Këto janë disa nga pikat kryesore të planit urgjent të qeverisë greke për përballimin e krizës migratore duke dashur të çojë një mesazh te të gjithë emigrantët që kërkojnë të hyjnë në Greqi për të qëndruar këtu apo për të shkuar drejt Evropës. Do të presin të mbyllur tashmë në këto qendra aprovimin e azilit dhe në rast të kundërt do të kthehen menjëherë andej nga kanë hyrë.

“Plani i ri parashikon ruajtjen e kufirit me një agjenci të re për mbikëqyrjen e kufijve, përshpejtimin e procesit të azilit, funksionimin e qendrave të mbyllura në ishuj dhe kthimet e menjëhershme”, u shpreh Alkiviadis Stephanis, zëvendësministër i Mbrojtjes.

Athina vlerëson  se procesi ekspres i dhënies ose jo të azilit që deri tani kërkonte 218 ditë , do të frenojë fluksin e madh ndaj dhe do të punësojë edhe 500 persona të tjerë në zyrat e kërkesave për azil që kanë shkuar në 67000 brenda vetëm një viti.

“Kryeministri Kyriakos Mitsotakis e ka ngritur çështjen në të gjitha kontaktet e tij me krerët europianë, në Kombet e Bashkuara dhe në Samitin e BE. Theksojmë nevojën për përgjegjësi dhe solidaritet, forcimin e rolit të Frontex, ndryshimin e marreveshjes së Dublinit, formimin e një politike të përbashkët evropiane të azilit, por edhe një ndarje të drejtë të barrës se krizes migratore”, tha Stelios Petsas, zëdhënës i qeverisë.

Ndërsa qeveria Mitsotakis trumbeton se me masat që po merr do të mbyllet edhe kampi famëkeq i Morias, më i madhi në Evropë dhe me kushtet më çnjerëzore, të gjitha partitë opozitare kritikojnë këtë plan duke e quajtur të pamjaftueshëm, të pamenduar dhe të palogjikshëm.

Top Channel