Vlorë/ Institucionet sorollasin qytetarin për shpronësim, kryerjen e pagesës i’a faturojnë njëra-tjetrës

Prokuroria kërkoi burg për inspektorin që prishi objektin pa asnjë proceverbal, ndërsa gjykata e la të lirë.

Ministria e Infrastrukturës nëpërmjet portalit “Shqipëria që duam” i kthen përgjigje qytetarit që s’ka fonde për të shlyer detyrimin, dhe ndërkohë urdhëron Bashkinë e Vlorës që të marrë përsipër shpronësimin. Pas më shumë se gjashtë muajsh ankesa tek “Shqipëria që duam”, me qytetarin luhet ping pong mes Bashkisë Vlorë dhe Ministrisë së Infrastrukturës dhe Energjisë. Si përfundim, bashkia ngre “supet” para Fiksit dhe thotë që fonde nuk ka.

Leka Kapllanaj u kthye nga Italia për të bërë një ankesë në emisionin Fiks Fare, pasi pas tre vitesh që atij dhe bashkëshortes i kanë prishur shtëpinë ende nuk janë shpronsuar siç i takon me ligj. Ai tregon për Fiksin që sipas tij është shpresa e fundit për të zgjidhur hallin që i ka rënë, se shtëpinë ja kanë shembur më 08.05.2017, pasi aty do të vijonte ndërtimi i projektit të Lungomares.

Shtëpia e tyre u prish gjatë kohës që ishin në Itali, pa u lajmëruar dhe pa asnjë proceverbal për prishjen e objektit. Në këto kushte ata bënë një kallëzim në prokurori, por gjykata nuk e vuri drejtësinë në vend.

Fiksi zbuloi se gjatë hetimit të prokurorisë është provuar fakti se për prishjen e këtij objekti nuk është mbajtur asnjë proceverbal nga ana e inspektorëve të IKMT-së Tiranë dhe as asaj të IMT-së Vlorë. Nga deklarimet e shtetasit Kledjon Ramaj, me detyrë kryeinspektor i IMT-së Vlorë, rezulton se ai nuk ka dijeni për prishjen e banesës së zonjës Merita Kapllanaj. Ndërsa shtetësja Ina Luçaj me detyrë përgjegjëse e IMT-së, dega Vlorë nuk ka marrë pjesë në prishjen e asnjë objekti me datë 08.05.2017, datë kur është prishur edhe objekti i Merita Kapllanaj.

Prokuroria në të dyja shkallët e gjyqësorit kërkoi deklarimin fajtor të të pandehurit Fatmir Metaj, i cili ishte edhe në krye të operacionit për prishjen e këtyre objekteve, për kryerjen e veprës penale “Shpërdorim detyre”, ndër të tjera dënimin e tij me një vit heqje lirie. Por gjykata çmoi që inspektori i IKMT-së Tiranë ishte i pafajshëm.

Rreth dy vite më vonë, pasi objekti ishte prishur, me datë 14.09.2018 Ministria e Infrastrukturës dhe Energjisë, bëri njoftimin për shpronësim publik të banesës së Merita dhe Leka Kapllanaj.

Aktualisht, portali “Shqipëria që duam” , pas ankesës së qytetarit është duke ndërmjetësuar bashkëpunimin mes Bashkisë Vlorë dhe ministrisë për të vendosur se kush do t’i çel fondet për shpronësimin. Por në 9 përgjigje që i janë kthyer qytetarit, qëndron fakti që familja Kapllanaj ende nuk është shpronësuar, pasi insitucionet ja kalojnë problemin njëri-tjetrit.

Fiks Fare kontaktoi zyrtarisht me Bashkinë e Vlorës, e cila në përgjigjen e saj thekson faktin që bashkia e ka të pamundur shpronësimin e këtij rasti pasi buxheti është miratuar që në Dhjetor të vitit 2018. Dhe më datë 18.07.2019 i ka kërkuar Ministrisë së Infrastrukturës dhe Energjisë si edhe Ministrisë se Finanacave mbulimin e këtij efekti financiar.

Duke përcaktuar përfundimisht se cili është edhe Insitutcioni që duhet të bëjë pagesën. Qytetari, shtëpia e të cilit është prishur në fillim të vitit 2017, më në fund e di se ku duhet të trokasë për të marrë dëmshpërblimin e munguar këto tre vite.

Top Channel