Maqedoni e Veriut/ Dështon takimi Zaev-Mickovski për marrëveshjen mbi ligjin për Prokurorinë Publike

Zaev foli për mediat pas takimit dhe e akuzoi kreun e opozitës se ka tentuar t’i mbrojë ish-zyrtarët e lartë të VMRO-DPMNE-së të akuzuar për shpërdorim detyre në periudhën e qeverisjes së vendit.

“ Kisha shpresë se do të arrijmë një zgjidhje dhe të ecim përpara, por kërkesa e opozitës është kundër çdo logjike, është kundër BE-së, NATO-s, kundër vlerave e parimeve të shtetit ligjor. Besoja se më në fund do të heqin dorë nga paraardhësit e tyre, do të lenë mënjane Gruevksin dhe idete e tij e do te punonin për të ardhmen e vendit, por kjo nuk ndodhi. VMRO-DPMNE-ja kërkon që rastet e Prokurorisë Speciale të jenë nën kontrollin e tyre, të mbyllet procedimi i tyre, të gjitha procedurat para-hetimore dhe hetimore, që të heshtim krimin që është bërë. Këtë nuk guxojmë ta lejojmë”, ka deklaruar kryeministri maqedonas.

Mësohet se qeveria kishte ofruar formimin e një prokurorie të re që do të ndjekë korrupsionin e lartë dhe ku prokurori i parë do të zgjidhet me propozim të opozitës. Zaev është shprehur i gatshëm për vazhdimin e negociatave – e siç thotë – është në pritje të opozitës nëse ndërron mendjen dhe pranon kompromisin e ekzekutivit.

Top Channel