Situatë e tensionuar paraqitet aktualisht në qytetin e Shkodrës ku po zhvillohet takimi elektoral i kryeministrit Edi Rama. Protestuesit e opozitës janë përplasur me forcat e policisë, duke kundërshtuar praninë e Ramës.
Foto nga tensioni në Shkodër, gaz lotsjellës dhe gurë në përplasjen protestues-polici
Gazetarja Anila Hoxha raporton se policia ka përdorur edhe gazin lotsjellës, për të bërë të mundur shpërndarjen e protestuesve, ndërsa këta të fundit janë kundërpërgjigjur me gurë dhe sende të tjera.
Mbështetësit e opozitës vijojnë të qëndrojnë pranë sheshit ku po mbahet mitingu elektoral i Partisë Socialiste. “Rama ik” është thirrja më e shpeshtë që dëgjohet nga protestuesit.
Edhe kryebashkiakja Voltana Ademi ka zbritur në shesh për t’ju bashkuar protestës së opozitës që kundërshton praninë e kryeministrit Edi Rama në Shkodër. Ademi u shpreh pak minuta më parë se shkodranët nuk do të lejojë uzurpimin e qytetit nga një kriminel si Edi Rama. Menjëherë sapo Voltana Ademi është afruar pranë kordonit të policisë, ndaj saj u hodh gaz lotsjellës. PD e konsideroi veprimin e policisë ndaj kryebashkiakes si një akt të paprecedent.
Gjatë përplasjeve, një grup protestuesish kanë tentuar të rrëmbejnë një auto-ambulancë për të çarë kordonin e policisë. Ishte sërish ndërhyrja me gaz lotsjellës që bëri të mundur që kjo përpjekje të mos realizohej.
“Më 1 korrik ose do të jemi në burg politik si Bardh Spahia dhe shumë qytetarë të tjerë, ose do të jemi në emigrim masiv”, u shpreh Ademi në një deklaratë të dytë.
Voltana Ademi i bashkohet protestës: Nuk lejojmë kriminelin Rama të uzurpojë qytetin
Top Channel
