Në brigjet e plazheve të Adriatikut, edhe pse tashmë pushuesit e parë kanë nisur të shfaqen, ndesh rëndom mbetje plastike, qese e bidona, një pjesë e hedhur nga njërëzit e një pjesë e nxjerrë nga deti, si dëshmi e ndotjes, e cila cënon të ardhmen e mjedisit dhe turizmit në vend.

“Është shumë e dëmshme. Isha ulur në një bar dhe erdhën dy turistë sllovakë të cilëve u bëri shumë përshtypje ndotja këtu. Kryetari i bashkisë mban më shumë përgjegjësi se ai është i pari i Durrësit, po edhe ne qytetarët”, thonë njerëzit.

Jovani ka punuar 40 vjet në ndërmarrjen e plastikës së bashku me bashkëshorten. Tani janë në pension dhe i njeh shumë mirë pasojat e ndotjes nga plastika: “Ne kemi punuar 40 vjet në plastikë dhe e njohim mirë plastikën. Na ka lënë akoma të sëmurë neve, jo më detin ku është bërë nami. Është shumë e dëmshme. Në kohën e Enverit, neve na jepnin qumësht se ishte gjithë helme, si polivinil kloridi etj. Plastikat janë të tmerrshme për ambjentin, për detin e për këdo. Edhe qeset vazhdojnë lëre çfarë thonë. Nuk i kanë hequr. 70-80 përqind përdorin po ato qese”.

E ndërsa institucionet përgjegjëse edhe pse i detyron ligji tregohen apatike për të ndaluar qeset një përdorimshme, ka ende shpresë, pasi vetë qytetarët mendojnë se duhet të kontribojnë për këtë:“Ndotja e ambientit është shumë e dëmshme si për shëndetin e njeriut si për mjedisin. E mira është që të sensibilizohen të gjithë dhe mbeturinat t’i hedhin në vendin e duhur. Kjo bëhet gradualisht. Të gjithë kemi detyrim për ta mbajtur pastër ambjentin që na përket të gjithëve”.

Top Channel