Rama ngre grupin e punës. Përgatiten dokumentet për kërkesat e studentëve

Për sa i takon çështjes së përgjysmimit të tarifave, një nga më kryesoret në kërkesat e studentëve, burime pranë kryeministrit saktësojnë se Edi Rama pritet të shkojë edhe më tej, por fillimisht duhet të nisë dialogu.

Burimet nga Kryeministria tregojnë gjithashtu se grupi i punës, i ngritur nga Rama, është duke punuar edhe me pikat e tjera, ndërkohë që mësohet se është vendosur në parim shkarkimi i anëtarëve të qeverisë në Bordet e Administrimit të universiteteve publike, si dhe ai i drejtorëve të konvikteve.

Por, edhe këto vendime nuk do të zyrtarizohen pa u hapur dialogu mes qeverisë dhe studentëve, gjë nga e cila kryeministri nuk ka ndërmend të lëvizë, pohojnë të njëjtat burime.

Përmes një postimi në Facebook, Rama iu drejtua përsëri studentëve duke nënvizuar se, mbetet vetëm të ulen e të flasin mbi një “pakt për universitetin”.

“8 pikat janë për mua vetëm pikënisja e një faze të re transformimi të botës sonë universitare. E këtë transformim mund, duhet e do ta bëjmë vetëm së bashku, përmes një pakti për universitetin mes studentëve dhe qeverisë. Adresimin e 8 pikave duhet ta nisim pa humbur kohë. Kemi punë për të bërë dhe nëse doni që uljen e tarifave ta mbyllim para pushimeve tuaja të Vitit të Ri, s’ka realisht minuta për të humbur me llogjet e kazanëve dhe rrugët shkencore të Doktorreshë Monës e të Profesor Lulit. Unë jam gati dhe s’kam asnjë kusht, prandaj bëhuni mbarë e më çoni fjalë, kur e ku doni të takohemi”, tha shkruan Rama.

Ndërkohë, Rama njoftoi se në mbledhjen e Qeverisë u miratua pakoja e Vitit të Ri për pensionistët, të cilët do të marrin 50 dollarë secili, si dhe çeku i bebeve për vitin 2019, në vlerën e 400 dollarë për fëmijën e parë, 800 për të dytin dhe 1.200 dollarë për fëmijen e tretë.

Top Channel