Kryeministri irlandez: Ligji për abortet, në fuqi brenda fundvitit

27/05/2018 15:46

Ligji i ri për abortin do të hyjë në fuqi brenda këtij fundvitit. Ky është premtimi i kryeministrit irlandez, Leo Varadkar, pas fitores së shënuar në referendumin e mbajtur një ditë më parë për përmbysjen e ndalimit kushtetues të abortit në vend.

Legjislacioni i ri do të lejojë abortin gjatë 12 javëve të para të shtatzënisë dhe deri në javën e 24 në rrethana të veçanta. Ministri irlandez i shëndetësisë, Simon Harris, do të kërkojë mbështetjen e kabinetit të enjten për të hartuar një ligj të ri.

Kryeministri Varadkar, tha ndërkohë se e shtuna do të kujtohet si dita kur Irlanda mori përsipër përgjegjësitë e saj si vend.

“Dita kur Irlanda u çlirua nga e fundit prej hijeve të saj dhe doli në dritë. Dita kur ne dolëm nga e kaluara, dita kur zumë vendin që na takon mes kombeve të botës”, tha ai.

Më shumë se dy të tretat e zgjedhësve, mbështetën vendimin për ndryshimin e ligjit, në të gjithë republikën e Irlandës, me përjashtim të Donegalit. Referendumi foli për një konsensus të gjerë për reformën në të gjitha kategoritë.

Amendamenti i tetë, ishte përfshirë në kushtetutën irlandeze në 1983 dhe i jepte të drejtë të njëjtë jete si të palindurit, ashtu edhe nënës. Mijëra gra irlandeze kanë udhëtuar drejt Britanisë së Madhe çdo vit për aborte, ose kanë përdorur pilulat e abortit.

Top Channel