Tusk, sot në Tiranë. Rama takon Merkelin të enjten

Vizita e tij në Tiranë është në kuadrin e një turi treditor, që presidenti i Këshillit të BE-së do të zhvillojë në vendet e Ballkanit Perëndimor. Qëllimi i vizitës janë përgatitjet e samitit BE-Ballkan, që do të mbahet në Sofje më 17 maj. Tusk do të marrë pjesë edhe në samitin e Brdo Brijunit, që do të zhvillohet në Shkup.

Tusk do të ndalet edhe në Podgoricë, Beograd, Sarajevë dhe në Shkup.

Vizita e Tusk në Tiranë vjen pas vizitës së shefes për Politikën e Jashtme të BE-së, Federica Mogherini, javën e shkuar, pasi Komisioni Europian i ka dhënë Këshillit rekomandimin zyrtar për nisjen e procesit të negociatave për anëtarësim për Shqipërinë.

Donald Tusk do të pritet me një ceremoni mirëseardhjeje nga kryeministri Rama dhe në orën 13 është parashikuar një konferencë në Pallatin e Brigadave.

Ndërkohë, mësohet se kryeministri Edi Rama do të niset të mërkurën në Gjermani, ku ditën e enjte do të takohet me Kancelaren Angela Merkel.

Top Channel