Mogherini bën sërish bashkë Thaçin e Vuçiçin në Bruksel

Në një njoftim të zyrës së kryediplomates europiane thuhet se, dy udhëheqësit do të vazhdojnë diskutimet mbi normalizimin e marrëdhënieve ndërmjet Beogradit dhe Prishtinës, e do të vlerësojnë punën e vazhdueshme në zbatimin e marrëveshjeve ekzistuese.

Takimi i fundit ndërmjet tyre është mbajtur në Bruksel më 20 shtator të vitit 2017, po nën kujdesin e Mogherinit. Gjatë qëndrimit së fundi në Shtetet e Bashkuara, kreu i shtetit serb u shpreh se fuqitë perëndimore nuk duan të flasin se kujt i takon Kosova dhe e trajtojnë atë si çështje të mbyllur.

“Jam i kënaqur me punën dhe përpjekjen tonë, por nuk jam i kënaqur me rezultatet. Kjo, sepse vendet perëndimore qëndrojnë fuqishëm në mbështetjen dhe ruajtjen e Pavarësisë së Kosovës”, ka thënë ai.

Në një nismë të nisur me kohë, Vuçiç ka paralajmëruar se në muajin prill mund të paraqesë një platformë për zgjidhjen e çështjes së Kosovës, duke theksuar se për këtë nevojitet edhe mbështetja e bashkësisë ndërkombëtare.

Ai hodhi poshtë pretendimet se ka zhvilluar takime private me Thaçin, apo që të ketë diskutuar me të mbi ndarjen e Kosovës, e këtë e thotë edhe vet presidenti i Kosovës. Mediet në Kosovë, ndërkohë, citojnë gazetën serbe “Danas” të shkruajë se, Vuçiç ka në plan që deri më së largu janarin e vitit 2019 të ndryshohet Kushtetuta e Serbisë, në preambulën e së cilës Kosova shënohet si territor serb.

Top Channel