Dështon makina që ecën vet. Uber pezullon testet, pas aksidentit me pasojë vdekjen
20/03/2018 14:22
“Hëna ka hyrë në një epokë të re”/ Paralajmërimi i shkencëtarëve: Njerëzit po dëmtojnë seriozisht satelitin, me këto ritme… 14/01 23:23
Uber njoftoi pezullimin e testeve të makinave që ecin vet, pas një aksidenti fatal në Arizona të Shteteve të Bashkuara.
Një prej automjeteve të kompanisë së njohur goditi, duke vrarë në vend, një grua 49-vjeçare, e cila ishte duke kaluar rrugën, por jo në vijat e bardha.
Makinat që lëvizin në mënyrë të pavarur, me pilotë automatikë, janë përfshirë edhe në raste të tjera në aksidente rrugore, ama kjo është hera e parë që përplasja rezulton vdekjeprurëse.
Si Administrata Kombëtare amerikane e Sigurisë Rrugore, ashtu dhe ajo e Sigurisë së Transportit po dërgojnë ekipe hetuesish në vendin e ngjarjes. Kompani të mëdha të prodhimit të makinave, si Ford, General Motors, apo Tesla janë duke investuar fort në kërkimet që lidhen me makinat vetëdrejtuese, të përshkruara shpeshherë si e ardhmja e industrisë së automobilëve, e të përshëndetura edhe si mënyrë e mirë për reduktimin e aksidenteve në trafik.
Mjaft shtete amerikane i kanë mirëpritur testet, me shpresën se kështu do të rreshtohen në radhën e parë të përdorimit të teknologjisë së re. Por, nuk kanë munguar në të njëjtën kohë as paralajmërimet mbi rreziqet e përdorimit të saj, përpara se të jetë vërtet gati për publikun e gjerë.
Anthony Foxx, ish-Sekretar Transporti në administratën “Obama”, e konsideron aksidentin e Arizonës një thirrje zgjimi për industrinë e makinave dhe për vet qeverinë amerikane, që duhet t’i japë sipas tij një prioritet të veçantë sigurisë në rrugë.
Top Channel
