Vrasja e Ivanoviçit, policët serbë lihen të lirë

Gjykata Themelore në Mitrovicë ka dalë në përfundimin se nuk kishte baza të mjaftueshme për t’i dërguar në burg efektivët e komunitetit serb, Zharko Jankoviç dhe Dragisha Markoviç. Ata dyshohen se kanë larguar nga vendi i ngjarjes një gëzhojë plumbi dhe nuk e kanë dorëzuar bashkë me provat e tjera.

Siç theksohet në dosjen e Prokurorisë, kur hetuesit panë filmimet e kamerave të sigurisë vunë re se Jankoviç e kishte marrë gëzhojën dhe e kishte futur në xhep, ndërsa Markoviç, edhe pse dëshmitar i veprimit të kolegut të tij nuk ka reaguar.

Akuza thekson po ashtu se të dy policët kanë lejuar kalimtarët të hyjnë në vendin e krimit. Ajo nuk e ka pritur mirë vendimin e gjykatës, të cilin thotë se do ta apelojë.

Ivanoviç ishte kreu i nismës qytetare “Liri, Demokraci dhe Drejtësi”, kundërshtare e partisë kryesore serbe të mbështetur nga Beogradi, “Lista Serbe”, e cila është pjesë e qeverisë së Kosovës.

Politikani i njohur u qëllua për vdekje para zyrave të partisë së vet në Mitrovicën Veriore më 16 janar. Vrasja e tij u dënua gjerësisht nga zyrtarë të Bashkimit Europian, Serbisë dhe Kosovës.

Ivanoviç, vazhdimisht e kishte përsëritur se ai dhe familja e tij kishte marrë kërcënime dhe kishte kërkuar ndihmë nga Kosova, Serbia dhe të tjerët, por pa asnjë rezultat. Beogradi e shpalli vrasjen një akt terrorizmi dhe kërkoi që të lejohej të merrte pjesë në nxjerrjen e fajtorëve para drejtësisë.

Top Channel