Tragjedi në kanalin e La Manshit, mbytet varka me emigrantë që tentonin të mbërrinin në Britani, mes viktimave një grua dhe një fëmijë 23/04 11:35
Presidenti amerikan Donald Trump do t’i japë edhe një herë “dritën jeshile” marrëveshjes bërthamore me Iranin, por kjo do të jetë hera e fundit.
Siç njoftoi Shtëpia e Bardhë, nëse marrëveshja nuk do të ndryshojë, Amerika do ta braktisë. I pari i Uashingtonit do të firmosë një dokument, që konfirmon pezullimin e sanksioneve kundër Iranit edhe për 120 ditë të tjera.
Shtëpia e Bardhë kërkon rakordimin me nënshkruesit europianë të marrëveshjes me Iranin, për t’i bërë të përhershme kufizimet mbi pasurimin e uraniumit. Sipas ujdisë aktuale, ato pritet të skadojnë në vitin 2025.
Trump kërkon gjithashtu që të adresohet programi balistik i Iranit.
“Kjo është mundësia e fundit. Në mungesë të një marrëveshjeje të tillë me BE-në, Shtetet e Bashkuara nuk do t’i pezullojnë më saksionet kundër Iranit në mënyrë që t’i përmbahen marrëveshjes”, bëri të ditur kreu i Shtëpisë së Bardhë në deklaratë.
Ai paralajmëroi gjithashtu se do të tërhiqet në mënyrë të menjëhershme prej saj, nëse në një moment të caktuar do ta gjykojë të arsyeshme. Marrëveshja e cilësuar historike u firmos mes 6 fuqive globale dhe Iranit në vitin 2015.
Ajo parashikon reduktimin e aktivitetit bërthamor të shtetit me shumicë myslimane, në këmbim të pezullimit të sanksioneve të komunitetit ndërkombëtar. Por Trump e kritikon ashpër marrëveshjen e kërkuar nga Obama, që sipas tij është më e keqja që kanë nënshkruar ndonjëherë Shtetet e Bashkuara.
Top Channel
