Franca kundër Apple, hetohet ngadalësimi i iPhone-ve

Ligjet franceze në fuqi e konsiderojnë krim shkurtimin e jetës së një produkti me qëllimin të shtyhen blerësit drejt zëvendësimit të tij. Gjigandi amerikan i teknologjisë e pranoi në muajin dhjetor se modelet e vjetra të iPhone ishin ngadalësuar qëllimisht përmes përditësimit të software-ëve të tyre, por këmbënguli se një hap i tillë ishte hedhur nisur nga fakti që performanca e baterive të aparateve në fjalë, zvogëlohej ndjeshëm me kalimin e kohës.

Hetimi i drejtuar nga Agjencia e Mbrojtjes së Konsumatorit pranë ministrisë franceze të Ekonomisë pason padinë e depozituar një muaj më parë nga grupi-pro konsumatorit Stop Planned Obsolescence, Hop.

Grupi thotë se Franca është vendi i tretë që heton Apple-n pas Izraelit dhe Shteteve të Bashkuara, dhe i vetmi në të cilin kjo shkelje përbën krim. Ndëshkimi mund të përfshijë deri në 5% të xhiros vjetore ose edhe dënim me burg. Hop është i bindur se kompania amerikane e ka ngadalësuar qëllimisht performancën e modeleve iPhone përmes një update-imi të bërë software-ve, koha e të cilit përkon, siç vëren organizata, me hedhjen në treg të modelit të ri Iphone8.

Top Channel