Borë e ngrica në veri, pa probleme në qarkullimin e mjeteve

Sasi më të vogla deri në 10 cm janë regjistruar në zonat jugore dhe ato juglindore. Korrespondentët tanë në këto zona raportojnë se nuk janë regjistruar probleme në blokimin e rrugëve.

Në Rrugën e Kombit, pranë tunelit në Kalimash, dëbora ka arritur rreth 5 centimetra, por ndërhyrja e borëpastrueseve ka shmangur problemet në qarkullim.

Të gjitha akset rrugore që përshkojnë Qarkun e Kukësit janë të qarkullueshme normalisht, përfshirë edhe aksin Bajram Curri-Valbonë, ku trashësia e borës arriti në 20 centimetra. Aktualisht janë 20 borëpastruese dhe 4 fadroma në gatishmëri në të gjithë Qarkun e Kukësit. Furnizimi me energji elektike ka qenë problematik vetëm në njësine administrative Zapod.

Sipas shërbimit “Meteoalb”, orët e para të mëngjesit të së dielës kanë sjellë edhe rënie të ndjeshme të tempraturave, teksa në zonat veriore janë regjistruar deri në -4 gradë Celsius, ndërsa në bregdet dhe zonat e ulëta kanë zbritur me 5 gradë Celsius, duke regjistruar vlera 6 deri në 7 gradë Celsius.

Për shkak të këtyre temperaturave, korrespondentët tanë njoftojnë për ngrica në aksin kombëtar Bulqizë-Peshkopi, e në rrugë rurale sidomos në akset Ura e Çerenecit-Librazhd, Bulqizë-Krastë.

Situatë e vështirë prej pranisë së akullit në rrugë ka edhe aksi rrugor Qafë e Buallit që të çon për te minierat e zonës D, ku punojnë minatorët dhe ku terreni është i vështirë. Ndaj drejtuesit e automjeteve që përshkojnë këto rrugë duhet të përdorin zinxhirët.

Sipas “Meteoalb”, mëngjesi i së hënës ruan të njëjtat temperatura dhe vetëm në mesditë pritet që ato të rriten, rritje që do të vijojë edhe në ditët e para të javës që vjen, ndonëse ky shërbim parashikon të jetë e lagësht.

Top Channel