Borxhi i Apple, KE detyron Irlandën ta pranojë

Lajmi u konfirmua nga Ministria irlandeze e Financave dhe deri këtu nuk ka asgjë për t’u çuditur, me përjashtim të faktit se Dublini nuk i do këto taksa. Problemi u ngrit në gusht të vitit 2016, kur Komisioni Evropian vendosi se prodhuesi i iPhone duhet të rimbursojë shtetin irlandez me një shifër rekord prej 13 miliardë eurosh për taksa të papaguara prej vitesh, sipas gjykimit të qeverisë evropiane.

Në vendimin e KE-së shkruhej se përfitimet në taksa që Apple kishte marrë ishin të jashtëligjshme në kuadër të rregullave të BE-së, sepse i lejonin kompanisë amerikane që të paguante shumë më pak taksa sesa bizneset e tjera. Madje, KE-ja e çoi Irlandën në Gjykatën Evropiane të Drejtësisë këtë tetor, pasi nuk ka grumbulluar taksat e prapambetura. Apple sigurisht që e ka kundërshtuar vendimin e KE-së dhe e ka apeluar. Por, çudia qëndron në faktin se edhe Irlanda e ka apeluar vendimin dhe thotë se nuk dëshiron dhe as ka pse t’i marrë këto taksa.

Çështja është fare e thjeshtë. Irlanda ndërtoi suksesin e saj ekonomik duke u shndërruar në një vend me taksa të ulta për korporatat ndërkombëtare që kërkonin akses në BE dhe nëse nis të mbledhë taksat e prapambetura druhet se do të largojë kompanitë. Sidoqoftë, Irlanda 13 miliardët nga Apple do t’i marrë dhe do t’i ngrijë në banka, derisa të përfundojë apeli.

Top Channel