Gjiknuri-Aviacionit Civil: Mbroni interesat e udhëtarëve

14/11/2017 12:01

Ministri i Infrastrukturës Damian Gjiknuri i ka kërkuar drejtorisë së Aviacionit Civil tyë mbrojë interesat e udhëtarëve.

Ai ka prezantuar drejtorin e ri të Aviacionit Civil, Krislen Keri, ku tha se siguria ajrore duhet të jetë prioritet absolut dhe toleranca zero.

“Nuk mund të themi që fusha e aviacionit civil ka qenë më e sigurta sa i përket sigurisë aeroportuale, ku jo më larg se 1 muaj më parë, një djalë i një niveli amator arriti të thyente sigurinë e aeroportit, për të mos përmendur dhe raste të tjera më flagrante. Kjo histori duhet të marrë fund”, u shpreh Gjiknuri ndërsa insistoi se duhet të merren masat që episode të tilla mos të përsëriten më.

Prioritet tjetër sipas tij është ruajtja e pasagjerit shqiptar dhe mbrojtja e interesave të tij në përballjen me kompanitë ajrore.

“Histori pafund të pasagjerëve shqiptarë që lihen aeroporteve të Italisë apo vendeve tjera, por edhe këtu në Tiranë kemi raste të shumta. Ndërkohë që përgjigja e zakonshme është se marrëdhënia qytetar-kompani ajrore është private. Kërkoj angazhim maksimal, deri në të qenurit avokati i gjithësecilit që abuzohet nga kompanitë duke i vonuar, anuluar apo mos i lejuar të hipin në bord. Çdo njeri duhet të marrë hakun që i takon në bazë të ligjit, në mënyrë që të dekurajohen kompanitë së bëri këto lojëra”, nënvizoi Gjiknuri.

Gjiknuri kërkoi gjithashtu angazhimin e Autoritetit të Aviacionit Civil për fillimin e operimit dhe ndërtimit të infrastrukturës aeroportuale shtesë në vend. Ministri kërkoi nga drejtori i ri të ndërmarrë një reformë në institucion pasi kualifikimet e kërkuara për gjithësecilin, përshkrimet e punës lënë për të dëshiruar.

Top Channel