Një shtetas çek, Elchin Ragimov, 42 vjeç nga Praga është arrestuar pasditen e sotme nga policia kufitare e Hanit të Hotit pasi i janë gjetur 19 kg lëndë narkotike kanabis sativa.
Në një njoftim për shtyp policia e Shkodrës bën të ditur se në Ragimor është ndaluar duke dalë nga Shqipëria, në vijën e dytë të kufirit.
Agjentët kanë vendosur të bëjnë një kontroll të hollësishëm në mjetin e tij, tip “Opel” me targë “5AR 24 62”, me të cilin 42-vjeçari ishte drejtuar për në Malin e Zi.
Gjatë kontrollit të imtësishëm të automjetit, shërbimet e policisë kanë gjetur 24 pako të dyshuara me lëndë narkotike, të fshehura në pjesën e parakolpit dhe pjesën e pasme.
Pakot ishin të mbështjella me letër natriban dhe pas peshimit ka rezultuar se ato përbënin rreth 19 kilogramë kanabis.
Menjëherë më pas agjentët i kanë vënë pranga Ragimov dhe i kanë kaluar prokurorisë materialet hetimore nën akuzën e “trafikimit të lëndëve narkotike mbetur në tentativë”.
Top Channel