Shqipëria mbetet ndër vendet me përdorim të lartë të antibiotikëve, ndërkohë që në botë bëhet apel për të luftuar antibiotiko-rezistencën e bakterieve.
Por mjekët shqiptarë i bien shkurt duke e përshkruar në receta antibiotikë edhe kur pacienti është prekur nga gripi apo shpesh dhe farmacisti të sugjeon antibiotik duke e dhënë atë pa recetë ndonëse është ndaluar me ligj
“Mjeku përpara se të japë një antibiotik duhet të mendohet, duhet ta testojë pacientin nëse ai ka infeksion bakterial për të cilin është i nevojshëm antibiotiku, apo ka një infeksion viral që nuk trajtohet me antibiotik. Shpeshherë mjekët i bien shkurt. Zgjedhin një antibiotik me gamë të gjerë veprimi dhe e përdorin atë për një kohë të pacaktuar”, thotë Silva Bino, shefe e departamentit të sëmundjeve infektive.
Sipas Binos ka disa baktere të cilët kanë fituar rezistencë ndaj antibiotikëve të cilët vite më parë kanë shkaktuar edhe vdekjen e pacientit për shkak të infeksionit që ka marrë në plagë pas një operacioni që mund të ketë bërë.
“Ne kemi gjetur infeksione, sidomos stafilokoku medicilino-rezistent, apo edhe bakterie të tjera që është gjetur që janë rezistente ndaj antibiotikëve. Ajo që ne po vëmë re, sidomos në QSUT, si pasojë e sterilizimit më të mirë dhe të kujdesshëm është një ulje e infeksioneve të plagëve pas operacioneve”, tha Bino.
Lufta e mjekëve ndaj bakterieve vështirë se mund të fitohet pasi rezistenca është e pashmangshme.Por mjekët duhet të kujdesen të mos ta thellojnë atë, thekson shefja e departamentit të sëmundjeve infektive në ISHP.
Top Channel