“Rilindja urbane” në Jug, Rama inspekton investimet për çdo qytet

23/10/2016 00:00

Qarku i Gjirokastrës nxjerr vetëm 5 deputetë, por kryeministri Rama duket se ka nisur prej atje një fushatë parazgjedhore për të parë nga afër projektet kryesore të qeverisë për zhvillimin e qyteteve.

“Do të diskutojmë çfarë na duhet të bëjmë hap pas hapi, për të rritur edhe më shumë ritmin e qeverisjes, pavarësisht se jemi në fazën e fundit të mandatit të parë”, theksoi Rama.

Programi i “Rilindjes urbane” është i dukshëm në Gjirokastër, ku po zbatohen disa projekte për restaurimin e disa zonave të trashëgimisë kulturore, duke nisur nga 10 blloqe të Qafës së Pazarit.

“Do të shtojmë dhe dy blloqe të tjera, përveç këtyre 10 që përfshijnë Qafën e Pazarit me të gjitha rrugët që dalin. Punimet mbarojnë në maj të vitit 2017”, tha ministrja e Kulturës, Mirela Kumbaro.

“Në 8 vite s’morëm një lek, s’ishte shaka. Tani kryeministri i ka kthyer katër sytë për Gjirokastrën”, tha Flamur Bime, Prefekt i Gjirokastrës.

Sipas kryeministri Rama, programi i “Rilindjes urbane” ka ndikuar ndjeshëm në rritjen e turizmit, të ekonomisë lokale dhe rigjallërimit të qyteteve. Ky program po zbatohet në Tepelenë me rindërtimin e rrugës hyrëse të qytetit deri në kala, si dhe me rehabilitimin e shkollës së mesme.

“Është shtuar numri i turistëve vendas dhe të huaj. Më shumë kanë filluar dhe po vijnë anglezët. Mbi të gjitha këtu është gjallëruar dhe jeta”, tha Tërmet Peçi, kryebashkiak i Tepelenës.

Nga programi i “Rilindjes urbane” ka përfituar edhe Përmeti, një nga të paktat bashki që drejtohen nga një i zgjedhur i Partisë Demokratike. Me realizimin e projektit për rikualifikimin e qendrës, fasadave dhe një pedonaleje të gjatë synohet tërheqja e turistëve.

“Ne investimet për Rilindjen Urbane i japim për Përmetin. Pastaj me kë është ky, e di ky, neve nuk na duhet kjo punë”, tha Rama.

Por kryeministri e ndryshoi tërësisht tonin, kur u pyet në Gjirokastër për Lëvizjen Socialiste për Integrim.

“Ne kemi punën tonë, LSI-ja është në punën e saj. Jemi dy parti të një aleance dhe terreni është kaq i madh, saqë jo vetëm ka vend për t’u rritur së bashku, por ka edhe nevojë për t’u rritur së bashku”, deklaroi kryeministri Rama.

Top Channel