Ymeri: VV mban përgjegjësi për aksionet e saj

Ymeri tha se Albin Kurti shumë shpejt do të kthehet në Kosovë dhe siç tha ai, Vetëvendosje mban përgjegjësi për të gjitha aksionet e saj qoftë brenda apo jashtë institucioneve, ndërsa tha se veprimet e fundit janë të koordinuara edhe me dy subjektet e tjera opozitare.

Këto komente Ymeri i bëri të shtunën gjatë një konference për media ku paraqiti edhe rrezikun që i kanoset shtetit të Kosovës nga marrëveshjet e fundit të nënshkruara nga kryeministri Isa Mustafa në Bruksel.

Me këtë rast, Ymeri ka numëruar resurset kryesore ekonomike që ka Kosova e të cilat ndodhen në territoret e komunave me shumicë serbe, që me marrëveshjen e re, sipas Ymerit administrohen nga Asociacioni i Komunave, apo siç e quan në serbisht vetëvendosje, “Zajednica” per analogji me precedentin e ngjashëm sipas tyre në republiken srpska te Bosnjes.

“Që prej liqenit të Ujëmanit në veri, që prej pjesës më të rëndësishme të Trepçës në komunën e Zveçanit e deri tek resursi turstik që e ka Kosova në Brezovicë, e deri tek burimet e tjera të ujit që gjenden nëpër territorin e Zajednicës. Duhet ta kuptojmë që Zajdencia është entitet edhe territorial, përveçse juridik dhe politik dhe në këtë territor përmblidhen territoret e dhjetë komunave me shumicë serbe”, tha Ymeri.

Kreu i Vetëvendosjes tha se bastisjet e Policisë në zyrat e deputetëve të Vetëvendosjes nuk do të ndalin opozitën e cila sipas tij pas peticionit të nënshkruar nga qindra mijëra qytetarë do të organizojne edhe protesta në kundërshtim të marrëveshjeve me Serbinë.

“Natyrisht që ky proces i mobilizimit do të rezultojë me protesta dhe demonstrata kundër qeverisë dhe kundër këtyre marrëveshjeve. Por kjo nënkupton natyrisht se varet pak edhe prej rrethanave objektive në kuptimin e zhvillimeve politike që janë në këto institucione se instanca pushteti, veçanërisht te qeveria. Në këtë drejtim një datë të saktë nuk e kam sot mirëpo çka është e vërtetë dhe çka është e qëndrueshme është përkushtimi i tri subjekteve opozitare që në bashkëpunim me njëra tjetrën ti kundërshtojnë dhe të mos lejojnë zbatimin e këtyre marrëveshjeve në Republikën e Kosovës”, shtoi ai.

Në konferencën për gazetarë, kryetari i Vetëvendosjes akuzoi kryetarin e Kuvendit Kadri Veseli i cili sipas tij po përpiqet që të shmangë përgjegjësinë dhe ta kalojë menaxhimin e Kuvendit në duart e deputetëve, me qëllim që sipas tij, të nxisë dhunën mes tyre.

Top Channel