Minoritetet krijojnë bllok

22/10/2014 00:00

Deputetët e pakicave në Kosovë janë të zhgënjyer me përgjigjen që kanë marrë nga presidentja Atifete Jahjaga, e cila ka refuzuar kërkesën e minoriteteve që të dërgojë në Gjykatën Kushtetuese pikën 127 të vendimit.

Deputetët e komuniteteve pakicë janë takuar të mërkurën paradite në Kuvend për të diskutuar për përgjigjen negative të marrë nga presidenca.

“Realisht jemi të pakënaqur me përgjigjen e presidentes sepse atë e konsideronim ndërmjetëse mes pakicave dhe Gjykatës Kushtetuese dhe kishim konsideratën se ajo do ta dërgonte kërkesën tonë në këtë gjykatë, që më në fund të zgjidhej rasti i pikës 127. Qëllimi ynë është që të jemi të paanshëm, të respektojmë ligjet dhe Kushtetutën dhe gjithçka të zgjidhet në mënyrë demokratike”, deklaroi Duda Balje, deputete e komunitetit boshnjak.

Deputetja Balje ka thënë se në formimin e institucioneve kosovare do të marrë mbështetjen e minoriteteve ai opsion politik i maxhorances shqiptare që ka shumicën e votave.

“Ne tashmë kemi filluar disa veprime dhe nuk është mirë që të krijohen blloqe të ndryshme brenda Parlamentit, por siç po shkojnë gjërat mendoj se interesat e pakicave në Kosovë janë pothuajse të ngjashme dhe ne po ashtu mund të bëjmë diçka të tillë”, shtoi Balje.

Deputetët e minoriteteve kanë inkurajuar Bllokun paszgjedhor që të provojë edhe ai, qoftë përmes presidentes apo përmes Gjykatës Kushtetuese, që të kërkojë sqarime për pikën 127 të vendimit të Gjykatës për formimin e institucioneve.

Top Channel