Ligji i ri: Rrugët me pagesë

“Ne kemi pamundësi për shkak të situatës financiare të trashëguar, kemi pamundësi të ofrojmë shërbimet. Do të duhen një mënyrë tjetër, ajo është ofrimi i operatorëve privatë për të ofruar shërbime publikut me kosto racionale dhe me shërbime të përmirësuara”, tha Ahmetaj.

Në Komisionin Parlamentar të Ekonomisë, Ahmetaj sqaroi deputetët se vendimi është marrë pas një studimi të hollësishëm mbi gjendjen e infrastrukturës kombëtare.

“Nuk ka kufizim. Jemi duke parë disa akse në veri dhe në jug që janë sot pengesë për zhvillimin ekonomik dhe që buxheti i shtetit nuk ka mundësi t’i financojë. Jemi duke parë me vëmendje në mënyrë që t’ia ofrojmë për partneritet privatëve”, deklaroi Ministri Ahmetaj.

Rruga e parë që pritet të bëhet me pagesë për qytetarët është ajo Durrës-Kukës, kostoja e së cilës vazhdon të rritet pafund. Qeveria shpreson që veç mirëmbajtjes, të financojë përmes privatëve edhe përfundimin e saj.

Erjon Braçe, deputet i PS, kryetar i Komisionit të Ekonomisë: Pra edhe pse kemi shpenzuar 1.1 miliard euro për këtë rrugë duhet të paguajmë prapë?

Arben Ahmetaj: Jo 1.1 miliard. Më shumë se 1.1. Ka shkuar 1.3 miliard dhe kërkon minimalisht 100 milion të tjera.

Vitet e fundit ndërtimi i rrugëve ka marrë mesatarisht 500 milionë dollarë në vit, nga buxheti, të financuara përmes taksave të qytetarëve apo borxhit publik.

Ministri i Zhvillimit Ekonomik tha se kostoja e anulimit të koncesioneve, që sipas tij qeveria e kaluar ka dhënë në kundërshtim me interesin publik, mund të shkojë deri në 2.5 për qind e Prodhimit Kombëtar.

“Nëse të gjitha koncesionet që ne kemi gjykuar që janë ndërtuar përtej transparencës do të rrëzoheshin, dhe është një alternativë, kostoja për buxhetin e shtetit kalon mbi 250 mln euro. Imagjinoni se cfarë ngarkesë i kanë lënë buxhetit të shtetit dhe qytetarëve qeveria që shkoi”, shtoi Ahmetaj.

Taksat e reja, rrëzohen propozimet e qeverisë

Deputetët e maxhorancës në Komisionin Parlamentar të Ekonomisë kanë rrëzuar nismën e qeverisë për të vendosur dy taksa të reja kombëtare, mbi kartat e telefonave dhe automjetet.

Gjatë diskutimit të draftit, thuajse të gjithë deputetët janë shprehur kundër këtyre dy taksave, duke votuar kundër nenit përkatës. Në draftin fillestar Ministria e Financave kishte parashikuar që të taksonte me një tarifë fikse vjetore çdo kartë celulare, por edhe automjet, për të financuar shërbimin e urgjencës mjekësore.

Të dyja taksat e rrëzuara sipas llogarive do të sillnin në buxhet 6 milionë dollarë të ardhura në vit.
 

Top Channel