Hapja e portave të hidrocentraleve ka rikthyer përmbytjet masive në zonën e veripërdëndimor e të vendit për të disatën herë brenda pak kohëve.
Të dhënat e fundit tregojnë se në rrethin e Shkodrës, uji ka përmbytur mbi 4500 hektarë toka, ndërsa qindra banesa janë të rrethuara ose kanë prezence uji brenda tyre.
Para kamerave, banorët e zonës shprehen të revoltuar sepse askush nuk i kishte lajmëruar për hapjen e portave dhe rritjen e shkarkimeve.
Ata tregojnë se janë lënë pa asnjë ndihmë në këtë situatë ku vërshimi i uji ka shkatërruar të mbjellat, por edhe bazën ushqimore.
Ndërkohë, shkarkimet e larta nga hidrocentralet mbi Drin kanë rritur nivelin e ujit edhe në zonat që prej ditësh qëndrojnë të përmbytura si Oboti, Gorica dhe Shirgji.
Si pasojë e rritjes së shkarkimeve rruga nacionale e komunave Dajç dhe Velipojë është bërë e pakalueshme.
Ndërsa në qytetin e Shkodrës, dalja e liqenit ka përmbytur edhe rrugen pedonale, në zona të caktuara, pasi rrjedha e fortë e Drinit nga hapja e portave pengon shkarkimin e liqenit në lume.
Top Channel