Nis gjyqi Berisha-Balla

“Ashtu sikundër dhe pritej, pavarësisht kërkesës së përsëritur dhe njoftimit të rregullt të gjykatës, zoti Balla, me urdhër të zotit Rama, iu fsheh përballjes me drejtësinë duke mos u paraqitur në seancë, as vetë personalisht dhe as me përfaqësues ligjor”, deklaron Shkëlzen Berisha.

Djali i kryeministrit i bën thirrje publike zotit Rama që të mos pengojë proçesin gjyqësor dhe ta lejojë përfaqësuesin e vet të paraqitet në gjykatë për të përcjellë aty provat mbi të cilat ka ngritur shpifjet e tij.

“E ftoj atë të mos i shmanget detyrimit ligjor si një frikacak, që shpif e ndodhet përherë e kudo, përveçse aty ku i duhet të provojë me fakte dhe argumente ato që thotë”, deklaron Shkëlzen Berisha.

Ndërkohë, deputeti Balla ka reaguar përmes një njoftimi në rrjetin social Facebook, ku ka sqaruar motivet e mungesës së tij dhe ka ironizuar me vendimet e gjykatave, të shndërruara në “aneks” të kuzhinës së kryeministrit.

“Djali i babit kryeministër kujton se mund të blejë moralin dhe dinjitetin e humbur me vendimet e gjykatës së shndërruar në një aneks të kuzhinës së Sali Berishës. Lidhur me deklaratën e tij të sotme, sqaroj se gjykata dhe gjyqtari ishin njoftuar për mungesën time për shkak të pjesëmarrjes time në një aktivitet të rëndësishëm jashtë Shqipërisë”, ka thënë Balla.

Deputeti socialist i ka bërë thirrje kryeministrit Berisha dhe kalamajve të tij që të fillojnë të mendojnë me këmbë në tokë për transparencën e pasurimit të tyre marramendes.

“Sepse edhe 138 ditë na ndajnë nga dita kur do të rilindë edhe drejtësia e munguar. Sa për frikën, i them Shkëlzenit të pyesë më mirë babin e vet, se më njeh më mirë ai”, ka vijuar Balla.

Top Channel