Shkarkohet ambasadori Banaj

Top Channel ka mësuar se Ministria e Jashtme me një shkresë drejtuar Presidentit të Republikës më 19 Tetor 2012 i kërkonte kreut të shtetit, lirimin nga detyra të ambasadorit.

Sipas Ministrisë së Jashtme arsyeja e këtij propozimi, është mbarimi i mandatit për kryerjen e kësaj detyre. Kërkesa e Ministrisë së Jashtme është pranuar nga presidenti Nishani i cili më 20.12.2012  nëpërmjet dekretit numër 7865 e liron nga detyra Admir Banajn si ambasador i Jashtëzakonshëm dhe Fuqiplotë të Republikës së Shqipërisë në Mbretërinë e Arabisë Saudite, rezident, si dhe nga detyra e ambasadorit të Republikës së Shqipërisë në Mbretërinë e Bahreinit, në Sulltanatin e Omanit, në Kuvajt dhe në Republikën e Jemenit, jorezident.

Opozita e akuzoi ambasadorin Banaj se kishte shpërdoruar detyrën duke u kthyer në një sekser mes biznesmenti Zafar Ansar dhe zyrës avokatore të Argita Malltezit. Në intervistën e 15 Janarit per Top Channel, vetë Ansar tregoi se ishte ambasadori Banaj ai i cili i kishte prezantuar kompaninë e Argita Mallterzit për të vijuar tratativat e ndërtimit të një teci prej 100 milion eurosh.

Sipas një  mesazhi përmes postës elektronike që mban datën 22 Tetor 2007 ambasadori Banaj i shkruan Zafar Ansar se sipas opinionit të tij, ai duhet të vijonte së bashkëpunuari me Argita Malltezin, për vetë lidhjet që ajo ka përfshi aftësitë dhe përkushtimin.

Janë më shumë se tre korrespondenca mes Banajt dhe Ansar prej të cilave opozita thotë se ambasadori me dëshirën e tij apo imponimin e të tjerëve e ktheu veten nga një diplomat në urë lidhëse mes Argita Malltezit dhe Zafar Ansar, duke shkelur praktikat e një përfaqësuesi të shërbimit diplomatik.

Për të patur edhe versionin e zotit Banaj ne lidhje me korrespondencën që ai ka patur me biznesmenin Ansar, Top Channel e ftoi zotin Banaj të prononcohet, por kërkesa ende nuk ka marrë përgjigje.

PS: Prokuroria të nisë hetimet

Korrespondencën mes Argita Malltezit dhe biznesmenit Zafar Ansar, PS e quan një skandal të rëndë të trafikimit të influencës dhe konfliktit të interesit.

Deputetja Ermonela Felaj tha se në vend që vajza e Kryeministrit të japë shpjegime, formulon reagime të mbushura me baltosjen e opozitës.

“Janë paraqitur fakte, dokumente e mbi të gjitha publiku ka pasur mundësinë të dëgjojë dhe intervistën e drejtpërdrejtë të biznesmenit pakistanez të përfshirë në këtë ngjarje. Deri më sot zonja Argita Berisha pervec deklaratave me nje gjuhe arrogante nga ato qe deshmojne se me pushtetin mund te besh gjithçka,   ka zgjedhur të ndërmarrë një fushatë shpifjesh e akuzash qesharake.Deklaratat e zonjes Argita Berisha te lene te kuptosh se per te, te perdoresh pushtetin dhe firmen e babait Kryeminister ne kembim te 3  milion eurove, sic dëshmon biznesmeni pakistanez, eshte gjeja me normale. Per ne dhe per ligjin kjo eshte e papranueshme”, tha Felaj.

Përballë të tilla fakteve tashmë të bëra publike, deputetja Felaj ftoj prokuroinë të nis hetimet.

“Në dëshminë e biznesmenit Zafar Ansar u fol qartë për gjobën prej 3 milionë eurosh që vajza e Kryeministrit i kishte kërkuar biznesmenit në këmbim të firmës së babait të saj. Pikersisht per te gjitha keto arsye, ne i bejme apel prokurorise  që të nisë hetimin mbi këtë cështje të qartë konflikti interesi dhe kapjeje të shtetit e qe ne vetvete permbajne elemente te qarte te veprave penale te ushtrimit te ndikimit te paligjshem ndaj personave qe ushtrojne funksione publike, shpërdorimit te detyres apo korrupsionit”, theksoi Felaj.

Top Channel