Vizita e Clinton, blindohet Tirana

01/11/2012 00:00

Për 7 orë me radhë, sot, nga ora 10 deri në orën 17, disa nga akset kryesore të Tiranës do të jenë të bllokuara për shkak të vizitës së sekretares së Shtetit të ShBA, znj. Hillary Clinton.

Do të ndalohet parkimi deri në orën 17.00 në itinerarin Rinas, Qafë Kashar, rrethrrotullimi i Doganës, unaza e re, pallati me shigjeta, bulevardi Bajram Curri, hotel Dajti, etc, rruga e Elbasanit, Pallati i Brigadave, bulevardi Dëshmorët e Kombit, bulevardi Xhorxh Bush dhe bulevardi Zhan Dark. Korridore këto, që sipas policisë parashikohet të përdoren për zonjën Clinton, por që mbeten gjithësesi për t’u konfirmuar.

Ndalohet parkimi deri në orën 17.00

– Rinas – Qafë Kashar;
– Qafë Kashar- Rreth Rrotullimi i Doganës;
– Rreth Rrotullimi i Doganës-Unaza e Re-Pallati me Shigjeta;
– Pallati me Shigjeta-Bulevardi Barjam Curri-Ura e Lanës tek Hotel Dajti;
– Ura e Lanës tek Hotel Dajti-ETC- Rruga e Elbasanit;
– Rruga e Elbasanit-Pallati i Brigadave;
– Rruga Ismail Qemali-Blv. Dëshmorët e Kombit deri tek Hotel Sheraton;
– Bulevardi Dëshmorët e Kombit – Bulevardi Xhorxh Bush;
– Bulevardi Zhan Dark deri tek Pallati me Shigjeta.

Ndërkohë që në të njëjtin itinerar ku ndalohet parkimi do të ndalohet qarkullimi i çdo automjeti nga ora 10.00 deri në orën 17 të së enjtes.

Ndalohet qarkullimi
E enjte ora 10.00 – 17.00

– Rinas – Qafë Kashar;
– Qafë Kashar- Rreth Rrotullimi i Doganës;
– Rreth Rrotullimi i Doganës-Unaza e Re-Pallati me Shigjeta;
– Pallati me Shigjeta-Bulevardi Barjam Curri-Ura e Lanës tek Hotel Dajti;
– Ura e Lanës tek Hotel Dajti-ETC- Rruga e Elbasanit;
– Rruga e Elbasanit-Pallati i Brigadave;
– Rruga Ismail Qemali-Blv. Dëshmorët e Kombit deri tek Hotel Sheraton;
– Bulevardi Dëshmoret e Kombit – Bulevardi Xhorxh Bush;
– Bulevardi Zhan Dark deri tek Pallati me Shigjeta.

Ndërsa publik është bërë vetëm harta e rrugëve të bllokuara, Drejtoria e Përgjithshme e Policisë ka marrë masa për një shtim të madh të numrit të agjentëve që do të patrullojnë rrugët, si dhe do të marrin në ruajtje akset rrugore.

Edhe pse ka kërkuar bashkëpunimin e qytetarëve për të mos thyer kufizimin që ka vendosur në këto rrugë, një kontigjent prej të paktën 600 uniformash blu, nga gjashtë komisariatet e kryeqytetit, do të jenë në detyrë, ndërsa po kaq do të jenë në gatishmëri.

Nga ana tjetër, duke qenë pjesë e një protokolli amerikan, që një javë më parë kanë mbërritur dhjetra marinsa të cilët do të jenë në gatishmëri, por jo në patrullim.

Zonja Clinton do të zbresë në aeroportin e Rinasit rreth orës 10:30 të mëngjesit, në një vizitë që do të zgjasë pak më shumë se tre orë.

Takimin e parë zonja Clinton do ta zhvillojë në Pallatin e Brigadave me presidentin e Republikës, Bujar Nishani, ku do të marrë edhe dekoratën më të lartë, atë të Urdhërit të Flamurit. Më parë këtë dekoratë e ka marrë bashkëshorti i saj, Bill Clinton dhe ish-presidenti tjetër amerikan, George W. Bush.

Pas takimit me kreun e shtetit, zonja Clinton do të ketë një takim në Kryeministri me kryeministrin Sali Berisha. Në mesditë sekretarja amerikane e Shtetit do të mbajë një fjalim në Kuvendin e Shqipërisë në një seancë plenare.

Pas kësaj, zonja Clinton do të ketë ndalesën e fundit në hotel Sheraton, ku do të takohet me kryetarin e opozitës Edi Rama, e më pas me stafin e ambasadës amerikanë, që do të jetë edhe takimi i fundit i saj.

Top Channel