Ish-të përndjekurit politikë tentuan të organizojnë një protestë paraditen e së enjtes, pak minuta pasi në Tiranë kishte mbërritur sekretarja Clinton.
Protesta kishte për synim të tërhiqte vëmendjen e zyrtares së lartë amerikane në lidhje me problemet që ish-të përndjekurit politikë në Shqipëri po kalojnë.
Në fillim një grup ish-të burgosurish u tubuan në oborrin e Institutit të të Përndjekurve, por policia i pengoi ata që të lëviznin prej andej, duke i shoqëruar në komisariate.
Pas disa orëve qëndrim në komisariatin numër një, ish-të përndjekurit janë lënë të lirë pas orës 15:30, pasi kishte përfunduar vizita e zonjës Clinton.
Ish-të përndjekurit paralajmëruan përmes kreut të shoqatës së tyre, Skënder Tufa, se do t’i drejtohen Avokatit të Popullit për shkelje të të drejtave të tyre.
Muajin e kaluar ish-të përndjekurit përfunduan grevën e urisë, e cila u shqoërua me akte ekstreme siç ishte vetëdjegia e disave prej tyre, por ata deklaruan se do të vazhdojnë përpjekjet për plotësimin e kërkesave.
Top Channel