Viktimat e aksidenteve, bilanc lufte

Ndërkohë, nga aksidentet janë plagosur rreth 88 persona, ndër ta 15 gra dhe 7 fëmijë.  Ngjarjet tragjike kanë ndodhur pothuajse në të gjithë vendin, por rrethet me numrin më të madh të aksidenteve janë Tirana, Elbasani, Fieri, Fushë-Kruja dhe Lezha.

Në ditët e para të sezonit turistik u përgjak “Rruga e Kombit”. Viktimat ishin kryesisht emigrantë kosovarë që vinin për të kaluar pushimet në Shqipëri. Me 10 pjesëtar për patrullim Policia e Kosovës dukej e dorëzuar përballë aksidenteve të shtetasve të saj në rrugën Durrës-Kukës. Marrëveshja e patrullimit të përbashkët me policinë shqiptare nuk i lejon Policisë së Kosovës të vendosë rregulla shtesë përveç patrullimit të zakonshëm përgjatë autostradës. Në këto kushte aksioni i palës kosovarë ishte i paefektshëm në vendin tonë.

Përveç të ashtuquajturës “rruga e vdekjes”, ajo Fushë-Krujë-Milot, këtë vit aksidentet zgjeruan hartën. Sipas të dhënave zyrtare, rreth 29% e vdekjeve dhe 32% e plagosjeve në vend zyrtarisht ndodhin nga shpejtësia dhe sjellja agresive e shoferëve. Por aksidentet fatale kanë treguar se është domosdoshmëri ndërhyrja në përmirësimin e kushteve dhe sinjalistikës rrugore.

Statistikat tregojnë se 38.5% e vdekjeve në dy vitet e fundit kanë ardhur nga drejtuesit e rinj pa eksperiencë. Një faktor tjetër i shtimit të aksidenteve gjatë verës është edhe rritja e numrit të makinave që lëvizin në rrugë si pasojë e ardhjes së emigrantëve, çka rrit mundësitë e mosrespektimit të rregullave.

Të dhënat tregojnë se 40% e aksidenteve me vdekje apo me lëndime të mëdha mund të evitoheshin nëse pasagjerët do të kishin rripin e sigurimit të vënë.

Këto statistika, që përfaqësojnë një bilanc lufte, e bëjnë Shqipërinë disa herë më të pasigurtë se vendet më të zhvilluara europiane.

Top Channel