Berisha-Shaqiri, 7 vjet përplasje

Aq sa kokë më kokë ata janë takuar, siç tha dikur ambasadori amerikan John Withers, vetëm një herë, që kur zoti Berisha u bë kryeministër në 2005-ën.

Përplasjen më të fortë publike ata e patën kur qeveria çoi në Parlament disa ndryshime në ligjin për shërbimin informativ, i cili mes të tjerash përcaktonte një mandat për shefin e SHISH, që në mënyrë indirekte i hapte rrugë kryeministrit për ta ndryshuar kreun e shërbimeve sekrete, i cili varet nga kryeministri.

Përplasja në fakt nuk ndodhi me Bahri Shaqirin, por me ambasadën e Shteteve të Bashkuara të Amerikes, kur ajo drejtohej nga John Withers, i cili deklaroi se ligji, siç është ndërtuar, është i papranueshëm.

“Është me rëndësi jetike që SHISH të mbetet profesional, i pavarur dhe i lirë nga çdo ndërhyrje politike. Jemi të shqetësuar se ligji i minon këto parime”, deklaroi atëherë Withers.

Nën këtë ndikim, disa deputetë të mazhorancës rrëzuan ligjin në komisionin e sigurisë kombëtare, duke bërë që Partia Demokratike, për mungesë votash të mos e votonte ligjin e kundërshtuar nga ambasada amerikane.

Ky konflikt në Tiranë u transferua deri në Bruksel dhe në atë kohë u duk se ishte vendimtare ndërhyrja e sekretarit të përgjithshëm të NATO-s, Anders Fogh Rasmussen, që përmes një telefonate i kërkoi kryeministrit Berisha të tërhiqej nga vendimi i tij për të zëvendësuar drejtorin e shërbimit nëpërmjet ligjit.

Marrëdhënia mes qeverisë dhe Shërbimit Informativ Shtetëror nën drejtimin e Bahri Shaqirit u tensionua edhe më shumë pas 21 janarit, kur kryeministri Berisha deklaroi se shërbimi, megjithë kërkesën e policisë, nuk solli asnjë informacion për atë që kryeministri Berisha e quajti “puç” të opozitës dhe disa insitucioneve për rrëzimin e qeverisë.

“Këtë të dhënë, një institucion në Shqipëri nuk e kishte marrë dhe ky institucion është SHISH, ku taksapaguesit shqiptarë paguajnë jo më pak se 1 mijë vetë. Çfarë i mbylli sytë dhe veshët këtij shërbimi, kjo është punë e tij”, deklaroi Berisha vitin e kaluar.

Për koinçidencë, 2 ditë përpara 21 janarit, në emisionin ‘Top Story’, ambasadori aktual amerikan Alexander Arvizu, iu përgjigj një pyetjeje të gazetarit Sokol Balla.

“Bashkëpunimi me SHISH dhe zotin Shaqiri është i shkëlqyer. Kështu që sigurisht, nëse atij do t’i jepej një mandat tjetër, kjo do të mirëpritej përzemërsisht nga Shtetet e Bashkuara”, u shpreh Arvizu. Tani nuk ka më hamendime, dhe nëse do të kishte bast, ambasadori Arvizu do ta kishte humbur atë.

Top Channel