Misioni i BE-së për 12 prioritetet

Takimi konsultativ me qeverine shqiptare që do të zgjasë dy ditë ka nisur në Ministrinë e Integrimit. Diskutimi lidhet me verifikimin e planit te veprimit per zbatimin e 12 prioriteteve nga ku do të dalin edhe sygjerimet e këtij delegacioni. Ministrja e Integrimit Majlinda Bregu fillimisht i ka bërë një rezyme hapave të hedhur deri më tani me shoqërinë civile dhe Komisionin Parlamentar të Integrimit për pasjen e një plani veprimi sa më efikas ashtu edhe sic kërkohet nga BE.

“Reformat janë të përbashkëta, votimi ligjeve sidomos ato me 3-5 at janë të përbashkët, as mazhoranca nuk i voton dot vetëm dhe mbi të gjitha integrimi europian i vendit nuk është vetëm axhendë e qeverisë dhe as e vetëm opozitës,por është interesi i përbashkët i të gjithë shqiptarëve”, tha Bregu.

Vasilis Maragos, shef i njësisë për Shqipërinë në Drejtorinë e Integrimit u shpreh se Plani i Veprimit është një pikënisje e mirë në plotësimin e 12 prioriteteve. Gjatë fjalës së tij ai disa herë ka theksuar se duhen jo vetëm plane në letër por mbi të gjitha zbatimi i tyre.

“Ky nuk është një proces vetëm i plotësimit të një liste me detyra, që i dërgohet Brukselit dhe më pas gjerat të harrohen. Duhen reforma konkrete, ndryshime konkrete që zhvillohen nga institucionet që shpesh kanë edhe ndikim në jetën e qytetarëve. Ne jemi këtu t’ju ndihmojmë por edhe të jemi rigoroz sepse vendet anëtare të BE-së presin nga ne, të jemi rigorozë, pasi sic e dini standardet janë tejet të larta”, tha Maragos.

Nota kaluese ose mbetëse për Shqipërinë në marrjen e statusit të vëndit kandidat do të mësohet në mbledhjen e tetorit të Komisionit Europian. Muajt në vazhdim janë vendimtarë për vendin tonë në plotësimin e 12 prioriteve ku katër prioritet e para janë tërësisht me karakter polit ku përfshihet reforma parlamentare dhe ajo zgjedhore dy cështje të nxehta që presin zgjidhje nga politikanët e mazhorancës dhe opozitës.

Top Channel