Rama: Po dështon reforma zgjedhore

“Sot, sipas afatit të përcaktuar, ne duhet të ishim drejt finalizimit të reformës zgjedhore në pak ditë të mbetura të muajit shkurt. Fatkeqësisht jemi shumë larg këtij objektivi dhe kjo për shkak të një zvarritje që po bëhet gjithnjë e më shqetësuese nga ana e palës tjetër. Gjërat që përfaqësuesit tanë në komisionin e reformës zgjedhore kanë paraqitur ishin të lidhura me standartet e zgjedhjeve, janë të lidhura me zbërthimin e rekomandimeve të OSBE-ODIHR-it dhe domosdorshmërinë për mos të lejuar të përsëriten ato që kanë ndodhur në dy palë zgjedhje të shkuara”, deklaroi Rama.

Edi Rama ka rikujtuar rëndësinë që merr reforma zgjedhore jo vetëm për zgjedhjet e ardhshme parlamentare, por edhe në proçesin e integrimit europian.

“Kjo reformë, një prioritet kyç i BE që lidhet drejtëpërdrejtë me statusin e vendit kandidat, por është edhe një prioritet kyç i PS dhe opozitës që lidhet drejtëpërdrejtë me fatin e standarteve të zgjedhjeve të  ardhshme. Ne do të mbetemi të vullnetshëm për të miratuar një orë e më parë të gjitha ato ndryshime që më parë duhet të marrin konsensusin në komisionin e ligjeve dhe nga ana tjetër të shprehim shqetësimin që reforma zgjedhore në asnjë mënyrë nuk mund të kompromentohet”, theksoi Rama.

Deri tani komisioni ka arritur të bjerë dakord vetëm për çështje periferike dhe nuk ka prekur ende pikat nevralgjike të ligjit, siç është edhe sistemi zgjedhor, siguria, mënyra e numërimit të votave, etj.

Top Channel