“The Economist”: Shqiptarët lënë Greqinë

13/01/2012 01:34

Shqiptarët në Greqi marrin sërish rrugën e shtepisë. Kriza që ka pllakosur shtetin po i detyron emigrantqt t’i kthejnë sytë nga vendi i origjinës, shkruan The Economist, duke sjellë shembuj familjesh që mendojnë kthimin edhe pse fëmijet e tyre kanë lindur në Greqi e njëri-tjetrit, i flasin në gjuhën e atjeshme.

Të dhënat e fundit të censusit treguan se në Shqipëri jetojnë vetëm 2.8 milionë banorë, disa qindra mijëra më pak nga sa pritej dhe 7,7 % më pak se një dekadë më parë.

1,4 milionë besohet se kanë emigruar në 20 vitet e fundit, më shume se gjysma e tyre drejt Greqisë. Por tashmë të papunë në vendin helen, shqiptarët kanë nisur të kthehen.

Shumë nga burrat punonin në ndërtim dhe ky sektor në Greqinë fqinje, për momentin është pothuajse i ngrirë. Shumë njerëz kanë ikur, të tjerë planifikojnë të largohen, të gjithë flasin për këtë, thotë një mësuese, Valbona Hystuna për të përjavshmen prestigjoze.

Në të kaluarën shumë shqiptarë kanë jetuar e punuar në Greqi ilegalisht, por pjesa më e madhe e tyre tani kanë leje të rregullta qëndrimi. Problemi është se këto leje mund të humbasin kur humbet vendi i punës.

Edhe pse shumica e shqiptarëve janë integruar më së miri në këtë vend, grekët ja u kanë bërë jetën të vështirë, shkruan The Economist duke cituar mësuesen Hystuna.

Artikulli përmend edhe cështjen e remitancave, që sic thotë The Economist, vështirë të maten me saktësi, por të dhënat ekzistuese dëshmojnë rënie të ndjeshme.

Në 2007-ën, emigrantët dërgonin në shtëpi 950 milionë euro. Në 2010-ën, kjo shifër u rrudh në 690 milionë, dhe tremujorin e parë të 2011-ës, shkoi në 475. Në vitin 2009, është e llogaritur që remitancat përbënin deri në 9% të GDP-së.

Por sërish ekonomia, në ndryshim me atë të Greqisë nuk shkoi në recesion. Shumë emigrantë po i transferojnë paratë e tyre në bankat shqiptare, nga frika e asaj cfarë mund të ndodhë nëse Greqia del nga zona e euros.

Madje nga Shqipëria po kthejnë sytë edhe disa kompani greke, që kanë nisur të ngrenë firmat e tyre atje nën drejtimin e shqiptarëve të besuar, të cilet kishin punuar për ta në Greqi.

Deri tani, pasojat e te qenit një ekonomi e vogël e varur në masë të konsiderueshme nga Greqia dhe Italia të goditura nga recesioni kanë qenë negative, por jo shkatërrimtare, përfundon artikulli.

Top Channel