Arratisja e Kumbaros, peng edhe gjyqi në Tiranë

07/12/2011 00:00

Arratisja e Ilir Kumbaros në Londër mban peng edhe zhvillimin e procesit gjyqesor në Gjykatën e Krimeve të Rënda në Tiranë.

Seanca e radhes gjyqesore ndaj ish-SHIK-asve, Arben Sefgjini, Ilir Kumbaro dhe Avni Koldashi, te akuzuar per rrembimin dhe zhdukjen e biznesmenit shqiptaro-maqedonas Remzi Hoxha ka deshtuar, pasi Gjykata e Krimeve te Rënda është në pritje te leterporosise derguar autoriteteve te drejtesise ne Londer per deshmine ose ekstradimin e Kumbaros.

Ne fakt procesi ne Tirane zvarritet prej disa javesh pasi edhe me pare nuk ishte bere e mundur te merrej deshmia e Ilir Kumbaros, i cili pretendonte se ishte shtetasi kosovar Shaqa Shatri. Tashme me arratisjen e Kumbaros, kane mbetur pezull si procesi i ekstradimit te tij nga Gjykata e Londres ashtu edhe procesi per zhdukjen e biznesmenit Remzi Hoxha ne Tirane.

Sakaq, Gjykata e Krimeve te Renda eshte ne pritje edhe te nje leterporosie derguar autoriteteve te drejtesise ne Maqedoni, ku i kerkohet gjykates se Shkupit qe te dergoje ne Tirane vendimin qe e ka shpallur biznesmenin Remzi Hoxha te vdekur.

Misteri për Kumbaron

Vazhdon misteri i zhdukjes së Ilir Kumbaros në Londër, i cili kërkohet nga drejtësia shqiptare për vdekjen dhe zhdukjen e biznesmenit Remzi Hoxha.

Policia Metropolitane në Londër thotë për Top Channel se ende vazhdojnë përpjekjet për gjetjen e Ilir Kumbaros, pas urdhër-arrestit të lëshuar në datën 1 Dhjetor për kapjen e tij, pasi ai nuk u paraqit në seancën e rradhës në Gjykatën “Uestminster”, për esktradimin në Shqipëri.

Zyrtarët e Policisë Britanike thonë se Njësia e Ekstradimit në Scotland Yard  është në kërkim të z.Kumbaro, ndërkohë që në bazë të urdhër-arrestit të lëshuar janë vënë në dijeni aeroportet dhe pikat e kalimit kufitar për kapjen e tij në rast se ai tenton të largohet nga Britania.

Ndërkohë djali i Ilir Kumbaros, pas një komunikimi disa ditor përmes email-it thotë për Top-Channel se babai i tij është person i zhdukur.

Ai refuzon të flasë për televizionin tonë edhe pas insistimit për të shpjeguar versionin e familjes për zhdukjen e  z.Kumbaro, kur ishte hera e fundit që ata ishin në kontakt me të dhe se cfarë kanë bërë për të ndihmuar autoritetet për gjetjen e babait.

Ndërkohë organizata Missing People ku listohen të gjithë personat e humbur apo të zhdukur në Britani, të kontaktuar nga Top Channel, konfirmojnë se asnjë person me emrin Ilir Kumbaro nuk është regjistruar në listën e personave të humbur.

Ilir Kumbaro herën e fundit është kontaktuar një ditë përpara seancës së 1 dhjetorit nga avokati i tij, ndërkohë të nesërmen në mëngjes nuk u paraqit në seancën, e cila ishte e para pas vendimit të marrë nga Gjykata Supreme në Tiranë për ekstradimin e tij në Shqipëri.

Historia “Kumbaro” filloi me vrasjen dhe zhdukjen e një biznesmeni dhe pasohet tani nga zhdukja e personit që kërkohet nga Drejtësia Shqiptare për zhdukjen e Remzi Hoxhës.

Gjetja eventuale e të zhdukurit Ilir Kumbaro pritet të hedhë dritë mbi zhdukjen e atij për të cilën ai akuzohet.

Top Channel